Díli, 02/08/2019 Sekretáriu Ezekutivu Fundo de Desenvolvimento do Capital Humano (FDCH) Sr. Isménio Martins da Silva ho Diretór Ezekutivu Telkomcel Yogi R. Bahar asina Memorandum Of Understanding (MoU) iha edifisiu FDCH, iha Palacio do Governu.

MOU ne’ebé asina ho objetivu hodi hametin kooperasaun no servisu hamutuk entre FDCH ho Telkomcel liu-liu iha area formasaun nian hodi hadi’a liután kapasidade no abilidade funsionáriu sira ne’ebé hala’o knaar iha Sekretariadu Tékniku FDCH.

Sekretáriu Ezekutivu FDCH Sr. Isménio Martins da Silva hatete hafoin estabelese tiha MoU ne’e iha tempu besik sei loke dalan ba funsionáriu sira ne’ebé hala’o knar iha Sekretáriadu Tékniku FDCH hodi ba tuir formasaun iha Telkom Corporate University (Telkom Corpu) iha Indonesia .

FDCH hili servisu hamutuk ho Telkomcel tanba formasaun ne’ebé fornese hosi Telkom Corporate University ho sertifikadu internasionál no partisipante ida bainhira remata ninia formasaun nia sei simu títulu foun no sertifikadu ne’ebé simu ho standar internasionál.

Diretór Ezekutivu Telkomcel Yogi R. Bahar agradese ba konfiansa ne’ebé FDCH atribui no konsidera mós momentu ida ne’e hanesan momentu istóriku ida ba Telkomcel ho FDCH.

“Formasaun ne’ebé sei hala’o nudár formasaun ida ne’ebé importante tanba ninia finalidade ne’e iha koñesimentu di’ak no iha mós títulu standar internasionál ninian,” hatete Diretór Ezekutivu Telkomcel Yogi R. Bahar.

Diretór ne’e afirma Telkomcel ninia prezensa iha Timor-Leste fó mós importánsia ba dezenvolvimentu rekursus umanus, no ohin loron kuaze timoroan ne’ebé servisu iha Telkomcel barak mak okupa pozisaun di’ak iha kompañia telekomunikasaun ne’e.

Entretantu partisipa mós iha serimónia asina MoU ne’e Asesora no Jurista, Koordenadores no Xefe Departamentu sira iha FDCH. (Média FDCH)

Related Post :


Total Viewer : 606 Views || Category: Notisia