Díli, 20/11/2019, Diretora Ezekutiva Fundo de Desenvolvimento do Capital Humano (FDCH) Sra. Leila ML. Carceres akompaña husi Asesora FDCH Sra. Ana Paula dos Santos no Koordenadór GAPPEFIV- FDCH Sr. Hermenegildo da Silva halo sorumutu ida ho Diretór Jerál  Arquivo Nacionál de Timor-Leste (ANTL) Sr. Horácio dos Santos Marques ho ninia ekipa ne’ebé kompostu husi diretór no  kargu xefia sira iha edifísiu  ANTL, Caicoli.

Sorumutu ne’e realiza tanba FDCH hetan konvite husi ANTL hodi  fahe informasaun servisu FDCH nian no oinsá ANTL bele asesu mai fundu iha FDCH hodi bele kapasita funsionáriu sira ne’ebé ohin loron hala’o sira ninia servisu iha instituisaun estadu ne’e.

Iha aprezentasaun Diretór ANTL Sr. Horácio dos Santos Marques hatete durante ANTL ninia  ezisténsia konsege konserva ona dokumentu istóriku ofisiál sira  iha area administrasaun Timor-Leste nian lubuk ida maibé ohin loron sei hasoru dezafiu iha area rekursus umanus liu-liu ba iha arquívista nian nune’e husu tulun ba FDCH atu oinsá ANTL bele asesu fundu mai iha FDCH hodi kapasita funsionáriu sira.

Entretantu Diretora Ezekutiva FDCH Sra. Leila ML. Carceres husu ba ANTL atu koordena ho Ministériu Administrasaun Estatal (MAE) ne’ebé nu’udar instituisaun tuteladu  tanba ANTL ohin loron seidauk akredita iha FDCH nune’e seidauk preve orsamentu própriu ba planu no programa ANTL nian  iha Livru 6 Orsamentu Jerál Estadu (OJE).

Maske nune’e, Diretora Ezekutivu ne’e hatete iha tinan ne’e no tinan oin 2020,  FDCH seidauk bele apoiu ho másimu ba ANTL maibé sei haree posibilidade atu apoiu tanba ne’e husu ANTL atu prepara planu no programa hodi submete mai iha FDCH tanba haree ba servisu ANTL nian ne’ebé importante tebes atu konserva no rai dokumentu ofisiál sira Timor-Leste nian.

Presiza mós atu tau importánsia hodi prepara mós rekursus umanus iha area arquívista nian tanba ohin loron area ne’e sei menus tebes ninia rekursus umanus.

Hafoin remata diskusaun Diretór Jerál ANTL Sr. Horácio dos Santos Marques  konvida mós Diretora Ezekutiva FDCH ho ekipa  halo vizita hodi haree direita servisu funsionáriu sira nian kona-ba prosesu servisu sira nian oinsá atu arkiva  dokumentu importante sira ne’ebé iha no haree mós dokumentu istóriku importante sira ne’ebé ohin loron ANTL konserva no rai  hanesan dokumentu patrimóniu estadu Timor-Leste nian ne’ebé sei sai hanesan informasaun importante ba peskizadór no estudante sira bainhira halo peskiza hodi  hakerek livru no istória Timor-Leste nian.(Média_FDCH)

Related Post :


Total Viewer : 1162 Views || Category: Notisia