Dili, 22/05/2018. Funsionáriu Fundo de Desnvolvimento do Capital Humano (FDCH) hamutuk ema na’in 22 iha Sesta feira (18/5) semana kotuk, simu sertifikadu hafoin tuir formasaun konabá Monitorizasaun no Avaliasaun ne’ebé hato’o husi Landi Institute iha Pusat Budaya Indonesia (PBI) Dili.

Formasaun ne’e hala’o ho objetivu atu funsionáriu sira husi FDCH ne’ebé partisipa iha atividade refere bele iha kuñesimentu liután konabá oinsa halo monitorizaun no avaliasaun bainhira hala’o sira nia servisu iha instituisaun ne’ebé finansia programa tomak kapasitasaun rekursus umanus nian iha Timor-Leste.

Hermenigildo da Silva, nuudar mós partisipante iha formasaun refere sente kontente tanba refleta tebes ba servisu FDCH nian no importante ba funsionáriu sira atu kuñese kle’an liutan konabá saida mak monitorizasaun no avaliasaun nune’e sira bele implementa iha sira nia knaar fatin.

“Formasaun ne’e refleta tebes ho saida mak ami halo durante ne’e bainhira halo monitorizasaun ba programa sira ne’ebé finansia husi FDCH, tanba ne’e hau sente importante tebetebes t atu bele ajuda ami hala’o ami nia knaar iha terrenu” dehan peskizador FDCH ne’e bainhira remata formasaun.

Entretantu Sekretáriu Ezekutivu FDCH Sr. Isménio Martins da Silva mós hato’o ba funsionáriu sira ne’ebé tuir ona formasaun atu  halo tuir métodu sira ne’ebé simu durante formasaun nia-laran, nune’e bele hasae liutan kuñesimentu bainhira hala’o monitorizaun no avaliasaun ba liña ministeriais sira nia programa.

“hau fiar katak imi hotu hatene ona saida mak monitorizasaun no avaliasaun, tan ne’e husu ba imi atu uza nafatin métodu sira ne’ebé imi hetan iha ne’e atu aplika ba servisu monitorizaun no avaliasaun ne’ebé ita sempre halo ba liña ministeriais nia programa formasaun sira” dehan Sekretáriu Ezekutivu ne’e durante ninia lia menon molok fahe sertifikadu ba partisipantes sira.

Iha biban hanesan, lider másimu FDCH ne’e mós hato’o ninia agradesimentu ba formadores husi Landi Institute Sr. Smith Ndila, Embaxador Indonesia ba Timor-Leste Sr. Sahat Sitorus no Jestor sira PBI nian ne’ebé oferese ona fatin ba formasaun.

Enkuantu formasaun Monitorizaun no Avaliasaun ne’e hala’o fazeadamente ba etapa rua (2). Etapa dahuluk ba formandus nain 7 hahu husi loron 23 – 27 Abríl 2018 , no etapa daruak hala’o ba formandus na’in 15 hahu husi loron 14 no remata iha loron 18 Maiu 2018 inkui fahe sertifikadu ba partisipantes husi Landi Institute no asiste direita husi Sekretáriu Ezekutivu FDCH Sr. Isménio Martins da Silva.(Media FDCH)

Related Post :


Total Viewer : 934 Views || Category: Notisia