Díli, 18/10/2019. Funsionáriu 18 husi Sekretáriadu Tékniku Fundo de Desenvolvimento do Capital Humano (FDCH) Sesta Feira semana ida-ne’e simu sertifikadu hafoin partisipa formasaun Project Managament Professional (PMP) iha Hotel Ramelau, Aimutin.
Objetivu husi formasaun refere mak atu kapasita funsionáriu sira iha area jestaun projetu. Sekretáriu Ezekutivu FDCH Sr. Isménio Martins da Silva iha ninia deskursu hatete katak prátikamente servisu jestaun projetu funsionáriu sira hala’o ona iha sira nia servisu loroloron, formasaun ne’e nuudar meius atu hasa’e koñesimentu jestaun projetu nian.
“Jestaun projetu la’os buat foun ba imi, loroloron imi hala’o hela maibé ida-ne’e espesífiku liu atu aumenta tan imi nia koñesimentu konabá project management liuliu iha planu to’o ninia implementasaun” Dehan Isménio iha ninia diskursu bainhira ensera formasaun.
Isménio fiar katak saida mak formandus sira hetan durante formasaun sei aplika iha sira nia karreira professional tantu iha FDCH rasik ka iha fatin seluk.
“Ohin hau akompaña imi nia aprezentasaun ikus, hau fiar katak imi sei aplika iha imi nia karreira professional iha FDCH ka iha fatin seluk”. Lideransa FDCH ne’e salienta.
Iha biban hanesan Sr. Prudêncio Dias nuudar formandus hato’o ninia agradesimentu ba Sekretáriu Ezekutivu FDCH tanba fó ona oportunidade ba nia atu hetan formasaun liuliu iha área Project Management Professional. Tuir nia maske formasaun ne’e foun ba nia, maibé sei fó impaku boot bainhira nia aplika iha ninia karreira professional iha futuru mai.
Formasaun ne’e realiza tanba iha kooperasaun entre FDCH ho TELKOMCEL konabá kapasitasaun funsionáriu FDCH nian. Presiza mós informa katak formasaun ne’e hala’o fazeadamente ba grupu 2 husi. Formasaun ba kada grupu hala’o durante loron lima nia-laran ho partisipantes ema nain 9 kada grupu.
Entretantu sertifikadu ne’e intrega direta husi formadores Indonésia Sr. Achmad Fuad Bay, MPM, PMP®, PMI-ACP® no asiste husi Sekretáriu Ezekutivu FDCH Sr. Isménio Martins da Siva no Reprezentante Telkomcel Timor-Leste. (Média FDCH)