Dili, 27/04/2018. Funsionáriu na’in 8 hosi Fundo de Desenvolvimento do Capital Humano (FDCH) termina formasaun durante loron lima iha area Monitorizasaun no Avaliasaun iha salaun Pusat Budaya Indonesia (PBI) Dili.

Molok atu termina formasaun ne’e iha loron ikus formandu ida-idak halo aprezentasaun kona-ba matéria sira ne’ebé sira hetan durante loron lima (5) hodi hasa’e liu-tan sira nia koñesimentu iha area monitorizasaun no avaliasaun nian.

Matéria sira iha formasaun ne’e mak hanesan saida mak Monitorizasaun no avaliasaun, tanbasá iha programa capacity Building monitorizasaun no avaliasaun, oinsá link capacity building ba impaktu dezenvolvimentu Timor-Leste.

Formasaun ne’ebé ho objetivu atu kapasita no hasa’e liu tan funsionáriu sira nia koñesimentu kona-bá area Monitorizasaun no Avaliasaun ne’e lori progresu pozitivu ida ba funsionáriu FDCH nune’e sei hadi’a liután sira nia servisu.

Formandu sira agradese ba oportunidade ne’ebé sira hetan tanba durante loron lima sira konsege aprende buat barak hosi formador sira, fiar katak matéria sira ne’ebé sira hetan sei ajuda hodi hadi’a liu-tan sira nia servisu iha area monitorizasaun no avaliasaun nian.

Formasaun ne’e realiza tanba servisu hamutuk entre Fundo de Desenvolvimento do Capital Humano (FDCH) ho Landi Institute, Bali-Indonesia liuhosi akordu formasaun ida ne’ebé hala’o iha loron 9 Abríl 2018.

Tuir oráriu, formasaun ne’e sei hala’o fazeadamente ba grupu rua (2) husi FDCH. Grupu 1 hamutuk ema na’in 8  remata ona ninia formasaun entretantu ba  grupu 2   sei tuir formasaun iha loron 14 -17 Maiu 2018 ne’ebé sei partisipa hosi ema na’in 13.

Enkuantu formadores sira ne’ebé atu fó formasaun ne’e mai husi Landi Institute, Bali-Indonesia.(Media FDCH)

Related Post :


Total Viewer : 754 Views || Category: Notisia