Dili, 15/10/2018, Sekretáriu Ezekutivu Fundo de Desenvolvimento do Capital Humano (FDCH) Sr. Isménio Martins da Silva partisipa iha serimónia abertura formasaun Indusaun  Jerál Obrigatóriu ba Funsionáriu Públiku rekrutadu tinan 2017-2018 hamutuk na’in 309 ne’ebé realiza iha Salaun Delta Nova.

Formasaun Indusaun Jerál obrigatóriu ne’e organiza hosi Instituto Nacional da Administração Pública (INAP) liuhosi apoiu finansiamentu hosi FDCH, Formasaun ne’e iha faze primeiru ho partisipante 150 no iha segundu faze sei partisipa hosi funsionáriu 159,  durasaun ba formasaun grupu primeiru hahú hosi 15-26 Outubru no grupu segundu sei hala’o iha 13-23 Novembru 2018.

Abertura ba formasaun ne’e hala’o hosi Ministru Interinu no Vise Ministériu Administrasaun Estatál, S.E.  Sr. Abilio  José Caetano, ne’ebé akompaña hosi Prezidente Komisaun Funsaun Públiku, Sr. Faustino Cardoso, Sekretáriu Ezekutivu FDCH Sr. Isménio Martins da Silva, Diretór Jerál INAP Sr. Agostinho Letencio, diretóres no formadores.

Diretór Jeral INAP Sr. Agostinho Letencio hatete kursu ne’e nu’udar kursu obrigatóriu ne’ebé ho objetivu atu fó koñesimentu ba funsionáriu públiku sira ne’ebé rekruta molok hahú sira ninia servisu iha administrasaun públiku nian.

Ministru Interinu no Vise Ministru MAE,  S. E. Sr.  Abilio José  Caetano iha ninia diskursu ba abertura formasaun ne’e , hato’o ninia apresiasaun ba kolaborasaun di’ak entre INAP,  FDCH, no CFP hodi realiza formasaun ne’ebé ho partisipasaun maioria hosi funsionáriu hosi munisipiu no Rejiaun Administrativa Espesiál Oe-Cusse Ambeno (RAEOA).

Vise Ministru ne’e hatete importánsia iha formasaun indusaun ne’e mak  bele lori funsionáriu sira koñese di’ak liu-tan lala’ok servisu iha administrasaun públiku ninian hodi serbí povu no nasaun.

“Oportunidade dez dias ne’e la’ós atu forma ita nia karákter, ita nia karákter ne’e formadu tiha ona iha família idak-idak nian hahu husi tinan 3-7 no tinan 14-17, tan ne’e wainhira ema ida tama ona iha vida adultu – presiza ma’ak atu guia liu tan, bele liu mos husi kursu indusaun ida ne’e, ita boot sira bele hasa’e ita boot sira nia kapasidade, ita boot sira nia koñesimentu  oinsá  atu serbí ita nia povu no ita nia nasaun,” hatete Vise Ministru ne’e.

Entretantu  Sekretáriu Ezekutivu FDCH Sr. Isménio Martins da Silva hatete orsamentu ne’ebé FDCH aloka ba formasaun indusaun obrigatóriu ne’e ho montante  $200.000 resin ne’ebé aloka ba formasaun primeiru faze no segundu faze to’o remata.

Sekretáriu Ezekutivu FDCH Sr. Isménio Martins da Silva afirma mós katak maioria funsionáriu hanesan husi Ministério de Saúde, sira ne’e nu’udar mós bolseiru ne’ebé nu’udar benefisiárius hosi FDCH tanba ne’e investimentu ne’ebé durante ne’e nasaun foun ne’e halo hahú hatudu ninia rezultadu.

Tanba ne’e atu hasa’e liután koñesimentu no kapasidade funsionáriu públiku sira nian FDCH husu atu Prezidente Komisaun Funsaun Públiku Sr. Faustino Cardoso hodi hola parte mós nu’udar membru Concelho Administração FDCH nian hahu hosi 2019.  Tanba finansiamentu FDCH mós barak mak atribui ba iha funsionalizmu públiku no CFP iha papel importante hodi bele hatu’ur polítika ba promosaun nian nomós sira seluk tan.

Iha oportunidade hanesan Prezidente CFP Sr. Faustino Cardoso hatete iha funsinalizmu publiku la iha negosiasaun kona-ba vensimentu hira no direitu saida, iha funsaun publika tuir teste aprovadu, admitidu ba hala’o servisu no la hanesan ho setór privadu.

“Iha funsinalizmu Públiku la’ós de’it atu buka servisu, iha mós papel seluk oinsa atu sai ezemplar iha prosesu kontrusaun, konsolidasaun estadu ida ne’e tuir valores sira ne’ebé mak ita nia konstituisaun define ona,” hatete Prezidente CFP  Faustino Cardoso.

Prezidente CFP husu ba funsináriu sira atu hatudu ezemplu di’ak ba sidadaun sira seluk iha ne’ebé de’it tantu iha servisu fatin no iha fatin sira ne’ebé fora hosi servisu fatin.

Funsionáriu sira ne’ebé tuir formasaun ne’e maioria mai hosi Munisipiu no RAEOA ne’ebé hala’o sira nia servisu iha Ministériu sira hanesan  Ministériu Saúde, Ministériu Justisa, Ministériu Edukasaun no Servisu Intelijénsia nian. (Media FDCH)

Related Post :


Total Viewer : 1224 Views || Category: Notisia