Díli, 20/09/2019. Sekretáriu Ezekutivu Fundo de Desenvolvimento do Capital Humano (FDCH) Sr. Isménio Martins da Silva partisipa iha serimónia enserramentu ba formasaun Lideransa, Jornalizmu investigasaun no Tékniku Tranzmisaun ba Funsionáriu Radio e Televisão de Timor-Leste Empresa Público (RTTL. E.P) iha Salaun Esperansa Comoro.

Formasaun durante loron sanulu (10) ne’e organiza husi RTTL.EP ho PT. Lestari Karya Gemilang  no hetan apoiu finanseiru husi FDCH.

Objetivu husi formasaun ne’e atu hasa’e kapasidade no koñesimentu funsionáriu sira ne’ebé okupa kargu xefia iha RTTL. E.P. no Jornalista inklui tékniku transmisor sira nune’e, hodi bele hala’o sira nia knaar ho di’ak liután iha futuru.

Sekretáriu Ezekutivu  FDCH Sr. Isménio Martins  da Silva iha biban ida-ne’e hato’o ninia kongratulasaun profunda ba partisipante sira no aprésia ba servisu hamutuk ne’ebé RTTL estabelese ho PT. Lestari Karya Gemilang husi Indonesia nu’udar formadores no FDCH hodi realiza formasaun ne’e ho susesu.

Lideransa FDCH ne’e salienta katak ba futuru parte sira bele hametin liután kooperasaun iha área formasaun sira ne’ebé relevante ho nesesidade servisu nian, ikus liu hanesan ita timoroan ita hotu hakarak kontribui ba dezenvolvimentu ba rai ida-ne’e liu-liu iha area informasaun.

Entretantu enserramentu formasaun ba formandus 30 ne’e marka mós prezensa Prezidente RTTL.EP Sr. Francisco da Silva”Gari”, Diretór Rekursu Humanus RTTL no formadores husi Indonesia. (Media FDCH)

 

Related Post :


Total Viewer : 499 Views || Category: Notisia