Dili, 08/04/2019, Ekipa Téknika hosi Governu Timor-Leste ne’ebé kompostu hosi Prezidente INFORDEPE Sr. Deolindo da Cruz nudár Xefe Delegasaun, Diretór Jerál Administrasaun no Finansas MEJD Sr. Abrão do Santos, Coordenadór Jerál Projetu Formar Mais (2016-2018), Sr.Raimundo Jose Neto, Asessora Téknika INFORDEPE, Sra. Ana Caetano, Assesora Téknika MEJD Sra. Joana Cunha, no Coordenador do Gabinete de Gestão e Sistema de Informacão nudár Reprezentante hosi FDCH Sr.Henrique do Rosario, halo aprezentasaun rezultadu negosiasaun ho  Instituto  Camões  Portugal  ba Sekretáriu Ezekutivu FDCH Sr. Isménio Martins da Silva,  hafoin ekipa ne’e fila hosi Vizita ba Portugal foin lalais ne’e.

Aprezentasaun ne’e hala’o iha salaun Knowledge Center FDCH ne’ebé ho objetivu atu informa progresu negosiasaun ne’ebé ekipa tékniku ne’e hala’o ho Instituto Camões I.P Portugal hodi kontinua implementa projetu foun ida iha ámbitu formasaun profisionál ba profesór sira iha lian  Portugés  nian, hafoin  projetu programa Formar Mais termina tiha iha 2018.

Iha aprezentasaun ne’e Prezidente INFORDEPE Sr. Deolindo da Cruz ne’ebé nudár Xefe Delegasaun ba ekipa negosiasaun ne’e hatete, hafoin halo diskusaun kle’an ho Instituto  Camões  hetan duni rezultadu pozitivu atu kontinua programa formasaun lingua  portugés  ba profesór  sira iha eskola hotu iha Timor laran, hosi Pre-Escolar to’o Eskola Secundaria ho nivel A2, B1 no B2 durante tinan 3 ho balun.

Tanba ne’e iha tempu besik Governu Timor-Leste ho Governu Portugal sei estabelese Memorandum of Understanding (MoU) ida.

Tuir proposta ne’ebé manda ba Instituisaun Camões I.P., Timor-Leste presiza tan formadór lian Portugés  35 , ne’ebé sei koloka ba Munisipiu 12 inklui ba iha RAEOA, iha projetu ne’e mós sei koloka mós formadór lian Portugés timoroan 51 atu fó formasaun ba profesór  sira.

Entretantu Sekretáriu Ezekutivu Fundo de Desenvolvimento do Capital Humano FDCH, Sr. Isménio Martins da Silva apresia no kongratula susesu ne’ebé ekipa téknika ne’e halo ho Instituto Camões Portugal.

Tanba ne’e FDCH prontu atu koopera nafatin ho INFORDEPE hodi implementa program formasaun lian Portugés ba profesór sira iha Timor laran tomak.

Estimasaun proposta orsamentu ba implementasaun  projetu ne’e rasik hamutuk $10.380.188,30 ne’ebé iha tinan 2019 FDCH disponibilidade no tau ona iha OJE iha livro#6 ho montante $1.150.000,00 no MEJD liuhosi rubrica 630 – Formasaun profisional no semináriu ho montante $320.122,00.

Projetu formasaun ne’e la’o ho finansiamentu contra partida ne’ebé sei finansia hosi governu Portugal no Governu Timor-Leste liuhosi Fundo de Desenvolvimento do Capital Humano. (Media FDCH)

Related Post :


Total Viewer : 1854 Views || Category: Notisia