DILI- 9/08/2017(FDCH) Secretaria Executiva interina Fundo de Desenvolvimento do Capital Humano-FDCH Sra. Leila Carceres partisipa iha serimónia despedida ho formandus SEPFOPE na’in tolu hodi ba partisipa formasaun iha servisu fatin (On the job training) durante fulan neen (6) hahú hosi 10/8/2017 to’o 10/2/2018 iha nasaun Malaysia.
Formandus timoroan na’in tolu ne’e mak hanesan João Martins hosi Munisipiu Baucau, Romenio Claveer Bendito Amaral hosi Munisipiu Dili no Simão Pedro hosi Munisipiu Aileu.
Durante iha Malaysia kompañia ne’ebé atu fornese formasaun ba timoroan na’in tolu ne’e mak Empire Automobile ne’ebé sei lori sira atu aprende iha area automotive nian liu-liu utiliza sistema komputadór hodi detekta mákina karreta nia at.
Orsamentu ne’ebé aloka hosi FDCH hodi fasilita formandus na’in tolu ne’e ninia atividade formasaun iha Malaysia durante fulan 6 hamutuk $28,330.
Sekretáriu Estadu SEPFOPE Sr. Ilídio Ximenes husu ba formandus na’in tolu ne’e atu pasiénsia nune’e bele aprende buat ruma durante fulan neen nia laran iha ema nia rai nune’e fila mai bele lori matenek ne’ebé sira hetan hodi kontribui fali ba dezenvolvimentu Timor-Leste.
“Imi ba lori Timor ninia bandeira iha ne’ebá, imi nia hahalok mak importante para hatudu iha ne’ebá, imi halo sala Timor mak naran fo’er, imi ba la’ós ba mesak, imi ba lori nasaun nia naran maske liu hosi SEPFOPE maibé imi ba lori Timór nia bandeira, ha’u husu ba imi, imi nia disiplina imi nia vontade, liu-liu mak tenke aprende,” Hatete Sekretáriu estadu Sr. Ilídio Ximenes iha ninia diskursu.
Sekretariu Estadu ne’e husu ba formandus sira atu uza oportunidade ne’e ho di’ak atu buka matenek, karik iha tempu aprendizajen la komprende tenke husu no buka hatene.
Secretario Executiva Interina Fundo de Desenvolvimento do Caiptal Humano- FDCH Sra. Leila Carceres kongratula servisu SEPFOPE tanba konsege estabelese ona sentru formasaun automotive iha Timor-Leste no husu ba formandus sira ne’ebé atu ba halo estájiu iha Malaysia atu hatudu sira ninia badinas hodi aprende.
“Aproveita oportunidade ne’ebé iha ba hodi aprende atu nune’e bele hasa’e ita boot sira nia abilidade, la’ós ba atu haree de’it nasaun foun , ita boot sira nia misaun mai Malaysia para atu aprende no hetan matenek husi ema seluk nune’e fila mai kontribui ba ita nia nasaun,” hatete Sra. Leila Carceres iha ninia diskursu.
Haree ba formandus sira ne’ebé sei ho idade joven Secretaria Executivu interina ne’e garantia katak investimentu refere sei lori benefisiu ba dezenvolvimentu nasaun foun ne’e nian iha futuru.
Entretantu diretór jerál ba polítika formasaun profisionál no empregu SEPFOPE Sr. Paulo Alves informa formandus na’in tolu ne’e pasa iha teste ne’ebé fó direita husi empreza Malaysia ninian hafoin sira remata sira nia formasaun iha sentru formasaun no eskola Tékniku Vokasionál Dom Bosco Comoro ho Sentru formasaun Téknika Becora.
Serimonia depedia ne’e hala’o iha Salaun enkontru Knua Buka Hatene SEPFOPE no marka mós prezensa hosi diretór sira SEPFOPE nian inan aman formandus sira no reprezentante empreza Malaysia nian ne’ebé atu simu formador sira.(Media FDCH)