DILI, 17/04/2017 (FDCH) Kandidatu bolseiru na’in 125 ne’ebé kompleta ninia dokumentus atu konkore ba vaga bolsa estudu ne’ebé Fundu de Desenvolvimento do Capital Humano (FDCH) atribui ba Kombatentes no Veteranus nian oan hamutuk na’in 52 iha tinan 2017 tuir ezame Test Potensiál Akademiku (TPA) no entrvista durante loron tolu.
Ezame TPA ne’ebé realiza iha edifísiu Pusat Budaya Indonesia, Mascarenhas Dili ne’e la’o ho transparénsia no rigorozu tebes tanba organiza direita husi Universidade Udayana Bali (UNUD) no Institut Teknologi Sepuluh Nopember Surabaya (ITS) no lori esperiénsia foun ba timoroan hirak ne’ebé konkore ba vaga bolsa estudu ba área enjeñaria ne’ebé FDCH atribui iha tinan 2017.
Konkorrente sira ne’ebé tuir ezame TPA hamutuk ema na’in 125 husi númeru ne’e na’in 52 mak sei pasa bainhira iha valor ne’ebé di’ak iha teste ne’e.
“Rezultadu final sei bazeia ba rekomendasaun husi Universidades sira hodi determina susesu ida ba kandidatu bolseiru sira atu hetan vaga iha Unversidade hodi simu bolsa estudu husi Governu RDTL liu husi FDCH-MPIE,” dehan Secretário Executivo FDCH, Sr Isménio Martins da Silva
Maske nune’e Secretário Executivo FDCH, Sr, Isménio Martins da Silva kontinua enkoraza sira ne’ebé la pasa atu prepara-an di’ak liután hodi kompete fali iha futuru se karik FDCH loke tan bolsa estudu.
“Ba futuru bainhira FDCH aprezenta ba ita nia nai ulun sira karik aprova tan programa, se iha oportunidade karik loke tan bolsa estudu ba área eksata, area siénsia no teknolojia, ita-boot sira ne’ebé agora tuir ona ezame sei hetan oportunidade atu mai tuir teste no sei la liu husi selesaun dokumentus,” hatete Secretário Executivo Isménio Martins da Silva.
Secretário Executivo FDCH, Sr, Isménio Martins da Silva apresia no agradese mós kooperasaun di’ak entre universidade sira, ministériu relevante sira hanesan Ministériu Solidariedade Sosiál (MSS) no Ministériu Edukasaun (ME) ne’ebé iha kooperasaun di’ak ho Secretáriado Tékniku FDCH hodi finaliza ezame ne’e.
Konkorente sira ne’ebé tuir ezame ne’e hafoin kompleta tiha sira nia dokumentu ba komisaun organizadora ne’ebé forma kompostu husi FDCH, Ministériu Solidariedade Sosiál (MSS) no Ministériu Edukasaun (ME) hahú husi loron 2 Marsu to’o 3 Abríl.
Matéria ne’ebé universidade sira fó ba konkorrente sira mak hanesan teste abilidade verbal, abilidade kuantitativa teste lójika no teste spatial.
Bainhira remata ezame universidade ITS Surabaya konsege fahe mós sertifikadu rekoñesimentu ba konkorrente hotu-hotu ne’ebé tuir ona ezame. (Média FDCH)