DILI,5/9/2017 (FDCH) Ministru Planeamentu no Investimentu Estratéjiku (MPIE) S.E Sr. Kay Rala Xanana Gusmão halo despedida ho dirijentes no funsionáriu sira ne’ebé durante ne’e hala’o servisu iha ministériu ne’ebé nia lidera iha VI governu 2015-2017.

Iha diskursu Ministru Kay Rala Xanana Gusmão husu ba funsionáriu sira atu kontinua koopera no halo servisu iha administrasaun públiku nian ho di’ak tanba ministru sira bele troka malu maibé funsionáriu sira sei la troka.

“Governu foun sei mosu ita husu boot sistema ne’ebé monta tiha ona, monta la’ós partidu ne’ebé kaer ukun, monta atu garante katak rai ida ne’e la’o ba oin ho di’ak, husu boot lalika sobu sistema sira ne’ebé iha ona, se nia hakarak sobu hotu sistema ne’ebé iha, ha’u hanoin tinan lima sei la halo buat ida, tanba sei sobu hadi’a, sobu hadi’a,” hatete Kay Rala Xanana Gusmão iha ninia diskursu ba Serimónia despedida no selebrasaun ba  vitória Fronteira Maritima ne’ebé lidera rasik hosi lider karismatiku ne’e.

Ministru konselleiru ne’e fiar katak governu foun ne’ebé sei forma iha tempu besik sei ho hanoin di’ak hodi lori dezenvolvimentu ne’ebé di’ak ba nasaun foun ne’e tuir Planu Estratéjiku Dezenvolvimentu Nasionál (PEDN) ne’ebé Timor-Leste iha.

Kay Rala Xanana Gusmão mós agradese ba servisu hotu ne’ebé durante ne’e funsionáriu sira halo hodi kontribui ba governasaun ne’e la’o to’o iha nia rohan.

Serimónia ne’e realiza partisipa mós hosi membru governu  sira hanesan Ministru Obras Publiku Transporte no Komunikasaun, Ministra Solidariedade Sosiál, Ministru MPRN, Ministru Defeza Vise Ministru Finansas emprezariu sira, dirijente sira no funsionáriu sira  iha ajénsia estadu nian ne’ebé providénsiado iha MPIE hanesan Fundo de Desenvolvimento do Capital Humano (FDCH) Agençia de Desenvolvimento Naçional ADN, SGP, emprezariu  nasionál no internasionál sira.(Media FDCH)

Related Post :


Total Viewer : 1072 Views || Category: Notisia