Maliana, 13/03/2018 Secretáriado Técnico Fundo de Desenvolvimento do Capital Humano (FDCH) hala’o workshop ida kona ba Programa konsultasaun ba area Potensialidade no Prioridade ba Desenvovimentu rekursus Umanus (RU) iha Munisipiu Bobonaro.
Objetivu hosi workshop ne’e atu aprezenta fila fali relatóriu Levantamentu Dadus Rekursus Humanus (LDRH) Munisipiu Bobonaro nian ne’ebé FDCH rekolla ona iha tinan rua liu ba nomós halo diskusaun gropus ba potensilidade, programa prioridade ba desenvolvimentu Rekursus Umanus.
Workshop ne’e abertura hosi Administradór Munisipiu Bobonaro Sr. Zeferino dos Santos Sequira, iha diskursu administradór munisipiu ne’e agradese ba FDCH tanba iha kooperasaun di’ak tebes ho autoridade sira.
“Ami agradese tebes ba ekipa FDCH ne’ebé koordena di’ak ho autoridade iha ne’e liu-liu PNDS no tempu di’ak ita hasoru malu, maibe ha’u hato’o deit katak fundu durante ne’e seidauk to’o mai iha ami, inklui ba funsionariu sira hotu ne’ebé hakarak kapasita ninia aan,” hateten Sr. Zeferino dos Santos Sequira
Hafoin loke worskhop ne’e ekipa 13 ne’ebé forma hosi FDCH ho Programa Nasional Desenvolvimento Suku (PNDS) ne’ebé tutela iha Ministeriu Administrasaun Estatal (MAE) halo kedas aprezentasaun kona-ba dadus rekursus umanu ne’ebé ohin loron FDCH rekolla ona.
Entretantu remata tiha aprezentasaun tama kedas ba diskusaun grupu hosi partisipante sira atu identifika no fó sira ninia paresér ba dezenvolvimentu rekursus umanus ne’ebé pertinente atu dezenvolve iha munisipiu ne’e.
Partisipantes iha workshop ne’e ema na’in 37 ne’ebé mak mai hosi, direitores servisu administrasaun setores, Administradór Postu sira, ONG’s, Reprezentantes Juventude, Camara Comericio Industria, Direitores Delegasaun Territorial, nomós funsionarius Servisu Administrasaun Munisipiu.(Media FDCH)