Díli, 21/09/2019, Komité Revizaun Orsamentu Polítika (KROP) 2020 aprova orsamentu adisionál hamutuk $3.8 millaun mai Fundu de Desenvolvimento do Capital Humano (FDCH) hodi kompleta pakote orsamentu FDCH nian ba tinan 2020 ho montante $23.8 millaun.
Orsamentu adisionál ne’e hetan aprovasaun iha KROP hafoin Ministru Ensino Superior Ciência e Cultura (MESCC) S.E. Sr. Longuinhos dos Santos ho Secretario Executivo Fundo de Desenvolvimento do Capital Humano (FDCH) Sr. Isménio Martins da Silva halo tiha aprezentasaun no justifikasaun kona-ba programa prioridade sira ne’ebé FDCH sei finansia iha 2020 tanba pakote orsamentu ne’ebé Ministériu Finansas atribui ba FDCH ho de’it $20 millaun nune’e sei la kobre hotu ba programa no planu sira ne’ebé Linhas Ministeriais no Instituisaun estadu akreditadu sira submete ona mai iha FDCH.
Hafoin aprezentasaun KROP autoriza hodi aprova orsamentu adisionál ho montante $3.8 millaun mai FDCH .
KROP ne’e rasik prezide hosi S.E. Primeiru Ministru Sr. Taur Matan Ruak ho Membru KROP ne’ebé kompostu hosi Ministru Estadu Prezidénsia Konsellu Ministrus, S.E. Sr. Hermenegildo Augusto Cabral Pereira, Ministru Reforma Lejizlativa no Asuntus Parlamentares, S.E. Sr. Fidelis Manuel Leite Magalhães, Ministru Obras Públikas, S.E. Sr. Salvador Soares dos Reis Pires, Ministru Transportes no Komunikasoins, S.E Sr. José Agustinho da Silva, Vise-Ministra Finansas no Ministra Interina S.E Sra. Sara Lobo Brites, Vise-Ministru Administrasaun Estatál S.E. Sr. Abílio José Caetano no Sekretáriu Estadu ba Igualdade no Inkluzaun, Sra. Maria José da Fonseca Monteiro de Jesus .
S.E. Primeiru Ministru no Membros KROP sira apresia ho servisu FDCH nian hodi assegura política do desenvolvimento dos recursos humanos nacional. Ekipa mos apresia plano no proposta FDCH nian ba 2020, hodi sujere atu nafatin mantein no hili kualidade fornecedores formasaun sira ka Universidades akolledora sira ho didiak hodi bele iha mós rezultadus ba beneficiáriu sira ho kualidade.
Entretantu akompaña mós iha aprezentasaun ne’e Diretór INAP Sr. Agostinho Letencio de Deus, Diretor Formasaun CFP Sr. Francisco da Costa Pereira, Sr. Ivan Alves hosi UPMA ne’ebé antes ne hola parte iha Komité Revizaun Orsamentu Teknika (KROT) no diretor ho asesor sira hosi MESCC no mós koordenadores hosi FDCH. (Media FDCH)