DILI, 3/08/2017 (FDCH) Secretaria Executivo Interina FDCH Sra.Leila ML Carceres Dos Santos,akompaña hosi Koordenador Gabinete Planu Peskiza no Verifikasaun (GAPPEFIV)  Sr. Paulo Miguel Vila Nova Dos Santos no mós konsultora Teknika Sekretariadu FDCH Sra. Ana Paula Dos Santos ho Ministru Edukasaun (ME) Sr. Antonio da Conceição ho ninia ekipa hasoru malu ho Primeiru Ministru Dr. Rui Maria de Araújo hodi relata problema ne’ebé bolseiru timoroan na’in 43 hasoru iha Cavo Verde.

Enkontru ne’ebé hala’o iha salaun enkontru Palacio Governu ne’e hahú ho aprezentasaun  relatoriu investigasaun ba problema ne’ebé bolseiru sira enfrenta  hafoin ekipa investigador ne’ebé forma hosi ME ho FDCH no instituisaun relevante sira hetan durante sira ninia investigasaun iha nasaun destinadu bolseiru timoroan hirak ne’e.

Tuir relatoriu investigasaun ne’ebé iha hosi bolseiru na’in 43 ne’e na’in 23 mak hakarak nafatin atu hela iha Cavo Verde hodi kontinua sira nia estudu maibe  bolseiru na’in 20 mak desidede hakarak atu fila hosi Cavo Verde.

“Kuandu ekipa investigasaun ba haree, iha estudante 20 de‘it mak hakarak atu hela iha ne’ebá atu eskola, 23 hakarak atu fila i resentemente depois desijaun ne’e hola tiha fila fali sira komesa na’in 3 tan hakarak atu hela portantu 23 hanoin atu hela 20 mak hanoin atu fila fali mai Timor,” hateten Ministro Edukasaun Sr. Antonio da Conceição.

Ministru Antonio da Conceição hateten hafoin aprezenta tiha relatóriu investigasaun, Primeiru Ministru Rui Maria de Araújo  husu atu fó tan tempu ba bolseiru sira semana ida ka rua atu nune’e sira bele foti desijaun lolos katak atu kontinua sira nia estudu ka sira hakarak fila.

“Por enkuantu situasaun estudante sira nia sei bele husik lai fó lai tempu ituan semana ida semana rua,atu sira bele hanoin didi’ak liu-tan se sira nafatin hakarak atu fila ou sira bele deside atu kontinua sira nia eskola iha nebá,” Haktuir Ministru Edukasaun

Iha mos alternativu seluk mak atu haruka destakamentu funsionariu ida ba Cavo Verde atu  halo observasaun no akompañamentu ba bolseiru sira to’o dezembru nia laran hodi nune’e bele haree se estudante sira sei hakarak atu kontinua iha ne’ebá ou sira deside atu fila.

Ministru Edukasaun mós hatutan tan liafuan ne’ebé hato’o husi Primeiru Ministru  katak  posivelmente Governu foun mai mak sei hola medidas atu haruka sira fila ou sira  kontinua estudu iha ne’ebá.

“Señor Primeiru Ministru nia opiniaun pesoal ne’ebé mak dehan estudante sira como iha ona baze de kontratu sira ba eskola iha Cavo Verde se sira lakohi ona eskola iha Cavo Verde sira tenki fila lai mai Timor   depois iha Timor maka bele tuir fali konkursu sira seluk ba Portugal nian ou ba Brasil depende oportunidades nebe mak iha,” Haktuir Ministru Edukasaun ne’e.

Problema ne’ebé bolseiru sira hasoru durante ne’e mak hafoin hetan tiha asaltu hosi sidadaun Cavoverdiano sira iha fulan hirak liu-ba to’o ohin loron bolseiru sira sente la seguru atu hala’o sira ninia estudu iha nasaun ne’e tanba ne’e sira husu atu hasai sira hosi Cavo Verde no ba fali hala’o sira nia estudu iha rai seluk no mós fila mai Timor-Leste.

“Sira nia razaun ne’e primeiru dehan katak osan atrazadu, ida ne’e los duni, situasaun ida ne’ebé mak ita hasoru, ida segundu tanba tratamentu saúde ne’ebé maka iha ne’ebá ladún diak,maibé kestaun sira ne’e normal iha fatin hotu-hotu, I terseiru razaun ne’e kestaun seguransa ba sira ameasa atu hela iha neba, maibé depois de ami nia equipa ba hare buat sira ne’e hotu hanesan justifikasun ne’ebé mak halo atu fó lia los ba saida mak sira hakarak, maibé buat hotu ne’ebé maka loloos maka sira bele, iha kondisaun atu hela iha ne’ebá tanba iha ne’ebá seidauk iha Guerra ida, seidauk iha buat ne’ebé atu ameasa sira nia estadista em termu da seguransa iha ne’e ba” Hateten Ministru Edukasaun Antonio da Conceição.

Bolseiru hirak ne’e maioria eskola iha área profesor nian tuir kontratu ne’ebé estabelese ho Governu Timor-Leste molok sira sai hosi Timor atu ba hala’o sira nia estudu iha rai li’ur.(Media-FDCH)

Related Post :


Total Viewer : 1191 Views || Category: Notisia