Dili.20/07/2016(FDCH) Ministériu Edukasaun haruka tan Bolseiru foun nain 75 atu estuda iha Cabo Verde, Cuba no Portugal iha fulan ne’e. Husi númeru bolseiru refere bolseirus nain 20 sei estuda iha Cabo Verde, nain 30 iha Portugal no bolseiru nain 25 estuda iha Cuba. Maioria estuda iha area profesór nian.

Ministru Edukasaun Sr. António da Conceição durante nia deskursu hato’o lia menon ba bolseiru sira atu aproveita oportunidade ne’e ho diak hodi estuda no demonstra interkambiu kultural hodi aprende dezenvolve pais ne’e iha futuru.

Nia hateten koperasaun ho governu Kuba atu haruka tan bolseiru nain 25 ne’e hafoin vizita ida husi Primeiru Ministru no esforsu husi embaixadór RDTL ba Kuba inklui vizita ikus Ministru Edukasaun hodi estabele akordu koperasaun iha Universidade Siensia Pedagójika Kuba foin lais ne’e.

Ministru Edukasaun hateten bolseiru sira ne’ebé atu ba estuda iha pais ho lian Portugés no Español obrigatóriu atu domina lingua tanba ne’e laiha razaun atu halo justifikasaun, la bele to’o tiha iha nasaun destinadu mak hato’o fali difikuldade kona-ba lingua.

“ Estudante sira iha obrigatóriu atu domina lingua, se la domina lingua sei la aprende buat ida, husi ne’e hau insistu ba imi hotu atu fo atensaun makas ba imi nia estudu inklui lingua”. Tenik Ministru Edukasaun Sr. António da Conceição

Enkuantu Bolseiru sira ne’ebé atu ba estuda iha Portugal sei aprende lingua Portugés durante fulan rua no husi ne’ebá sei haruka ba universidade hahu ho ano zero durante tinan ida nudár faze preparasaun ba tinan akadémiku nian.

Ministru mós husu atu bolseiru foun sira labele repete erro ne’ebé akontese iha pasadu ne’ebé komete husi bolseiru tuan balun, bolseiru foun sira tenki adapta an iha ema nia rai no laiha razaun atu justifika katak infrenta problema.

Iha oportunidade ne’e Ministru Edukasaun hateten bolseiru sira ne’ebé estuda iha rai liur laos deit responsabildade husi ministériu ka estadu maibé inan-aman no parte hotu nia responsabilidade atu tau matan hodi nune’e estudante sira bele hetan rezultadu ho diak.

Iha parte seluk Sekretáriu Ezekutivu FDCH Sr. Isménio Martins da Silva durante nia diskursu hateten governu através FDCH sei tau-matan no asegura nafatin ba bolseiru sira durante prosesu akadémiku.

“ ami sei asegura nafatin bolseiru sira maibe nafatin tuir baze legal ne’ebé iha mak hanesan kontratu ne’ebé asina tiha ona ho bolseiru katak se tenki remata iha tinan 5 maka tenki tinan 5, nune’e husu atu bolseru sira hamutuk nafatin komunika ba malu uainhira infrenta problema ruma atu labele izola an hanesan esperiansia iha pasadu, tanba kuandu izola an ona labele remata estudu nu fin individu ne mak lakon, inan-aman mak lakon no estadu mak sei lakon”. Tenik Sr. Isménio Martins da Silva

 Enkuantu Ministériu Edukasaun iha planu atu haruka tan Boleiru hamutuk 110, oras ne’e sei iha faze rekrutamentu nian.

Related Post :


Total Viewer : 1094 Views || Category: Notisia