Metinaro.22/07/2016(FDCH). FDCH servisu hamutuk ho FALINTIL-FDTL, SEPFOPE no ISAT konsege fo formasaun ba membru FALINTIL-FDTL hamutuk ema nain 63, husi númeru refere 53 mak remata ona kursu iha área enjineiru nian ho sertifikadu nivel 2.

Objetivu prinsipál husi kursu ida ne’e atu dezenvolve abilidade no kuiñesimentu profesíonál membru FALINTIL FDTL iha área konstrusaun sivil nian. Kursu refere hahú dezde fulan Abríl tinan 2015 no rematan iha fulan Maio 2016.

Brigadeiru Jenerál Filomeno Paixão iha ninia diskursu haktuir katak forsa sira laos presiza deit hatene tiru-malu maibe presiza mós aprende enjineiru no aprende médiku hodi apoiu mós  ema seluk.

“Ohin loron ita tama iha konjuntura foun iha defeza siguransa ne’ebé ita fó énfazia liu ba iha siguransa koperativu, ida ne’e la signifika ho tiru-malu deit maibé oinsa mak atu fó tulun mos iha area humanitariu nian. Tanba ne’e mak fó énfazia makas liu atu fo “Akudi” iha área medika nian, maibé ita nia forsa sira tenki aprende makas no iha matenek mak foin bele fó tulun ba ema seluk”. Tenik Brigadeiru Jenerál Filomeno Paixão

Iha oportunidade ne’e Brigadeiru Jenerál hato’o mos agradesementu ba partes hirak ne’e kontribui makas hodi realiza formasaun ba membru FALINTIL FDTL ne’ebé mak finaliza ona kursu iha nivel 2 nian maibe kontinuasaun husi fromasaun ne’e importante tebes hodi hasa’e liutan kapabilidade iha area enjineiru nian.

Entretantu Sekretáriu Ezekutivu FDCH Sr. Isménio Martins da Silva agradese ba FALITIN FDTL ne’ebé durante ne’e servisu makas hodi kolabora hamutuk ho FDCH, SEPFOPE no ISAT hodi bele remata kursu iha area enjineiru nian hodi kapasita membru FALINTIL FDTL.

Sekretáriu Ezekutivu propoin atu kontinua mós formasaun iha area Dezastre Naturais nian ho nune’e uainhira nasaun infrenta situasaun emerjensia ruma, forsa sira bele apoiu mós iha área ne’e.

“ita nia objetivu husi formasaun ne’e mak oinsa ita nia forsa sira ne’ebé gradua ona bele kontinua apoiu ita nia estadu iha area enjineiru nian hanesan konstrusaun eskola no estrada, ho nune’e bele implementa duni skills ka matenek ne’ebé hetan durante kursu ne’e”.

Sekretáriu Ezekutivu haktuir tan katak kursu ne’ebé mak hetan ona presiza atu kontinua hasa’e tan nivel tuir mai, nune’e forsa sira ne’e ikus mai bele sai fali formadór ba membru sira seluk. Enkuantu FDCH afirma katak sei kontinua kolabora no apoiu formasaun iha area ne’ebé mak forsa sira presija.(Media FDCH)

Related Post :


Total Viewer : 1654 Views || Category: Notisia