Dili, 22/10/2019. Ministru Ensino Superior, Ciéncia e Cultura (MESCC) S.E. Sr. Longuinhos dos Santos, MM ne’ebé akompaña mós husi Koordenadora Apoiu Estudante Sra. Amelia da Silva, Sekretáriu Ezekutivu Fundo de Desenvolvimento do Capital Humano (FDCH) Sr. Isménio Martins da Silva no mós Direitor Jéral Administração e Finanças Ministerio Ensino Superior, Ciência e Cultura (MESCC), Sr. Hernâni Viterbo da Costa Soares ofisialmente atribui subsidiu ba Veteranus no Kombantentes Libertasaun Nasionál nia oan, hamutuk ema nain 58 kompostu husi mane nain 27 no feto 31 ne’ebé sei ba hala’o estudu iha Nasaun Brazil, Filipina, Indonésia, Portugal inklui Timor-Leste.
Seremonia ida ne’e rasik realiza iha salaun Knowledge Center Fundo de Desenvolvimento do Capital Humano (FDCH),Dili Timor-Leste.
Ministru Ensino Superior, Ciéncia e Cultura (MESCC) S.E. Sr. Longuinhos dos Santos MM iha nia intervensaun hatete Governu iha responsabilidade boot ida ne’ebé mak atu apoiu tomak ba Veteranus no Antigus Kombantentes sira nia oan ne’ebé mak atu asesu iha nivel ensinu superior tantu iha rai-laran no mós iha rai- li’ur ne’ebé mak atu iha oportunidade para bele uza oportunidade ne’e ho diak para bele halo estudu ne’ebé mak ho diak no susesu.
Ministru mós hato’o katak atribuisaun subsidiu ida ne’e hanesan atribuisaun ida ne’ebé mak investimentu.
”Atribuisaun bolsa ida ne’e, hanesan atribuisaun ida ne’ebé maka investimentu ba formasaun, liu-liu husi governu ne’ebé mak hala’o la’ós deit ba pessoal, la’ós deit ba kada estudante, maibe investimentu ba Nasaun tanba Nasaun presija kria rekursu umanu ne’ebé maka kualifikadu ka kria mão de obra ne’ebé maka kualifikadu ka kria liman badaen ne’ebé maka kualifikadu atu bele tulun dezenvolvimentu ne’ebé maka sustentavel”. Hateten Ministrio Ensino Superior, Ciéncia e Cultura (MESCC) S.E. Sr. Longuinhos dos Santos MM iha nia intervensaun.
Ministru mós hatutan katak Nasaun no Governu rekoñese inan aman Veteranus no Kombantentes sira nia luta durante ne’e, ho esforsu tomak ne’ebé mak Veteranus no Kombantentes sira halo hodi hetan independensia nune’e, ohin Timor oan tomak bele goza ho nune’e, Ministru mós husu ba benefisiariu sira ne’ebé mak agora dadaun hetan oportunidade ne’e atu bele uza oportunidade ne’e ho diak, atu bele estuda, atu bele depozita estuda no esforsu nune’e bele hetan susesu tanba nasaun presiza ema ne’ebé maka iha rekursu umanu atu bele tulun dezenvolvimentu ne’ebé mak iha sustentabelidade.
Iha parte seluk, reprezentante inan-aman husi subsidiáriu sira, ne’ebé reprezenta husi Sr. Cornelio Gama ka L7, hato’o mos lia-menon ba estudantes hirak ne’e katak, uza oportunidade no responsabilidade ne’ebé simu ho diak tanba vizaun nasaun nian ba oin iha tinan 5 ka 10 mai, iha jovem sira nian liman no so edukasaun deit ma’ak bele ajuda hodi alkansa buat hotu.
Atribuisaun subsidiu ba veteranus no kombantentes nia oan sira ne’e organiza husi Unidade de Coordenação de apoio aos Estudantes (UCAE) iha Ministerio Ensino Superior, Ciénçia e Cultura (MESCC) no hetan finansiamentu husi Fundo de Desenvolvimento do Capital Humano (FDCH).
Partisipantes iha seremónia ne’e mai husi dirijentes sira husi MESCC, inan aman husi bolseirus sira no mós bolseirus sira rasik. (Media FDCH)