DILI, 6/12/2018 Ministério do Ensino Superior, Ciência e Cultura (MESCC) liuhusi Secretariado Técnico do Fundo de Desenvolvimento do Capital Humano (ST-FDCH) halo despedida ba joven na’in 10 ne’ebé atu hala’o estudu iha Portugal.
Joven na’in 10 ne’e simu bolsa-de-estudu husi Uniaun Europa ho típu espesialidade eskola tékniku profesionál nian iha fatin tolu (3) mak hanesan Escola Profisional Tondela, Escola Profisional da Ilha de São Jorge no Escola Profisional da Ilha Pico-Açores.
Sekretáriu Ezekutivu FDCH Isménio Martins da Silva hatete katak programa ne’e realiza tanba hetan orientasaun polítika husi Ministru MESCC atu haforsa dezenvolvimentu rekursus umanus iha rai-laran.
“Programa ne’e halo tanba hetan orientasaun polítika husi Sua Selénsia Ministru MESCC atu haforsa liutan rekursus umanus iha rai-laran ne’e”. tenik Isménio iha ninia introdusaun.
Isménio mós hatutan katak programa ne’e la hanesan ho programa bolsa estudu baibain tanba joven nain 10 ne’e la’ós ba tuir eskola formál, maibé ba tuir eskola tékniku profisionál haktuir prioridade polítika estadu nian.
Enkuantu iha biban hanesan Ministru MESCC Dr. Longuinhos dos Santos hato’o ninia agradesimentu ba Uniaun Europea tanba ajuda ona joven timoroan sira atu ba eskola tékniku profesionál iha Portugal.
“Hodi governu nia naran, hau agradese ba Uniaun Europea tanba halo ona esforsu atu ajuda joven timoroan sira ba tuir eskola tékniku profesionál iha Portugal”. Dehan Longuinhos iha ninia intervensaun.
Minístru Longuinhos hatete governu iha responsabilidade boot atu apoiu timoroan sira ne’ebé hetan bolsa estudu atu ba eskola iha rai liur husi organizasaun internasionál. Tan ne’e governante ne’e realsa katak governu fó apoiu bolseirus na’in 10 ne’e liuhusi billete viajen ho montante orsamentu $16,000.
“Governu mak apoiu billete viajen ba bolseirus na’in 10 ne’e ho montante orsamentu $16,000 dollar amerikanu”. Esplika governante ne’e iha salaun Kwoledge Center FDCH.
Vise Xefe Estadu Maior F-FDTL Brigadeiru Jenerál Falur Rate Laek nuudar mos reprezentante inan-aman husu ba bolseiru sira atu labele halo tuir esudante sira uluk ne’ebé ba estuda iha Portugal maibé hahalok la tuir estudante loloos.
“husu ba imi (bolseirus na’in 10), labele halo tuir estudante sira uluk ne’ebé hetan ona oportunidade atu ba buka matenek iha ema nia rain, ba la uza oportunidade ho di’ak maibé ba halo tuun-sa’e fali hodi estraga timór nia naran”. Tenik Brigadeiru ne’e pirante estudante sira.
Hataan ba ida-ne’e, bolseirus Zélia Melo Costa promete sei esforsu makaas atu kompete ho estudante sira husi nasaun liur, nune’e bele hamorin Timor-Leste nia naran iha mundu internasionál.
Tuir observasaun bolseiru na’in sanulu (10) ne’e kompostu husi mane na’in sia (9) no feto na’in ida (1). Entretantu marka prezensa iha programa refere mak Minístru MESCC Dr. Longuinhos dos Santos, Sekretáriu Ezekutivu FDCH Isménio Martins da Silva, Brigadeiru Jenerál Falur Rate Laek nuudar reprezentante inan-aman, Promotora husi Uniaun Europea Sra. Julia, Bolseirus na’in 10 inklui família sira. (Media FDCH)