Dili, 17 Maiu 2022. Salaun Delta Nova. Sua Exelensia Ministru Ensinu Superior Siénsia no Kultura (MESCC) no Prezidente Konsellu Administrasaun ba Fundo de Desenvolvimento do Capital Humano (CA-FDCH) Sr. Longuinhos dos Santos, akompaña husi Diretór Ezekutivu FDCH Dr. Cristovão dos Reis no Diretór Jeral Administrasaun Finansas MESCC Sr. Hernanio Viterbo Soares, ohin ofisialmente halo abertura ba Kursu Preparatóriu Lian Portugés no Pedagozia ho durasaun fulan tolu ba Bolseirus Admitidus hamutuk 78 ne’ebé kompostu husi bolseiru Bolsa Docentes 48 no bolseiru Bolsa Méritu 30 ne’ebé sei dezloka ba Portugál ho Brazil hodi hala’o sira ninia estudu husi nivel Lisensiatura, Mestradu no Doutoramentu.
Objetivu prinsipál ba kursu preparatóriu ne’e mak atu dezenvolve kapasidade partisipantes entermus ba utilizasaun lian Portugés iha kontextu akadémiku iha produsaun oral, hakerek sientifika nomós dezenvolve kompeténsia pedagozia atu aumenta koñesimentu partispantes kona-bá area siénsia ezata ka siénsia naturais no kompetnsia transversal hanesan kompeténsia ba jestaun projetu, kompeténsia ba servisu ekipa no kompeténsia komunikasaun nian.
Iha faze inskrisaun kandidatus bolsa docentes hamutuk hitu nulu resin haat (74) ne’ebé mai husi dosente sira iha universidade no instituisaun ensinu superior privadu hamutuk sanulu resin rua (12) iha rai-laran no to’o iha selesaun finál husi aplikante ne’ebé pasa/admitidu hamutuk haat nulu resin walu (48) ne’ebé sei hala’o estudu ho nivel Mestradu no Doutoramentu iha area oi-oin.
Nune’e mós Bolsa Méritu Kandidatus ne’ebé aplika ba vaga bolsa Méritu hamutuk atus lima hitu nulu resin tolu (573) ne’ebé maka aplika ba nivel lisensiatura hamutuk atus lima rua nulu resin sia (529) no nivel mestradu hamutuk haat nulu resin haat (44) to’o iha selesaun final aplikante ne’ebé pasa/admitidu hamutuk 30, na’in 5 sei hala’o estudu iha nivel Mestradu no na’in 25 ho nivel Lisensiatura.
Partisipa mós iha sermonia abertura ne’e Reitór sira, Prezidente Institutu, Diretór sira husi MESCC, Formadór sira, Koordenadores husi ST-FDCH no bolseirus admitidus.(Media-FDCH)