Dili,23/08/2018 Ministério Ensino Superior, Ciênçia e Cultura (MESCC) liuhosi Fundo de Desenvolvimento do Capital Humano (FDCH) servisu hamutuk ho kompañia TELKOMCEL no Telkom University ofisiálmente halo anúnsiu ba programa bolsa-estudu ho nivel lisensiatura ne’ebé oferese ba timoroan na’in 10 atu ba hala’o estudu iha area telekomunikasaun nian iha Indonesia.
Anunsia programa bolsa-estudu ne’e hala’o direita hosi Ministro Ensino Superior, Ciênçia e Cultura Sr. Longuinhos dos Santos akompaña hosi Ministro dos Transportes e Comunicações Sr. José Agostinho da Silva, Secretário Executivo do FDCH Sr. Isménio Martins da Silva, Embaixadór Indonesia ba Timor-Leste Sr. Sahat Sitorus, Vise Reitor III Telkom University Dr. Dida Diah Damajanti no diretór Kompañia TELKOMCEL Yogi R. Baha.
Ministro Ensino Superior, Ciênçia e Cultura Sr. Longuinhos dos Santos iha nia diskursu hatete eventu ne’e sai hanesan pasu ida importante atu asegura rekursu umanu Timor-Leste nian ba futuru, liu-liu iha area prioritaria ne’ebé importante hanesan Telekomunikasaun, ne’ebé sita mós iha Planu Estratéjiku Desenvolvimentu Nasionál (PEDN).
“Preparasaun rekursus umanus ne’ebé ho kualidade mak sai hanesan fatór boot, ne’ebé ita prepara ba ita nia nasaun atu lori ita nia povu ba rendimentu médiu alto,” hatete Ministru Longuinhos dos Santos.
“Iha relasaun ho Bolsa-Estudu, ita presiza asegura katak, ita nia politika sei fó resposta ba área estratéjika iha dezenvolvimentu no garante asesu ho baze ba programa espesifiku sosiál sira. No mós ita presiza assegura katak bolsa estudu ne’ebé ita hetan iha duni ligasaun ho Estudu Mapeamentu Rekursu Umanu ne’ebé Fundu de Desnvolvimentu do Kapitál Umanu halo ona,” hatete tan Ministru Longuinhos dos Santos.
Atu termina diskursu Ministru Longuinhos dos Santos husu iha faze selesaun ba kandidatu bolseiru sira tenke ho transparénsia, justu, rigorozu, konsidera ba jéneru no liga mós ba reprezentante sira hosi munisipiu.
Embaixadór Indonesia ba Timor-Leste Sr. Sahat Sitorus hatete fornesimentu bolsa-estudu ba timoroan sira nu’udar asaun konkretu kooperasaun nasaun rua nian hodi prepara timoroan sira ba futuru.
“Importante tebes investe iha rekursu umanus atu nune’e bele lori nasaun ba oin, Hamutuk ita bele, ida ne’e sai hanesan responsavel ida entre nasaun rua atu dezenvolve ba oin,” hatete Sr. Sahat Sitorus.
Diretór TELKOMCEL Yogi R. Baha hateten kapasitasaun ba rekursu umanus Timor-Leste nu’udar fatór importante ida ne’ebé presiza haforsa hosi investor sira ne’ebé ohin loron mai hala’o sira nia investimentu iha nasaun foun ne’e.
“TELKOMCEL la’ós mai hala’o negósiu de’it maibé kontribui mós ba dezenvolvimentu nasaun nian, liuhosi fornese bolsa estudu ba timoroan sira, ne’ebé hahú kedas iha tinan 2014,” hatete diretór TELKOMCEL Yogi R. Baha .
Entretantu Vise Reitor III Telkom University Dr. Dida Diah Damajanti hateten servisu hamutuk ne’e sai hanesan oportunidade ida ne’ebé di’ak atu hola parte ba dezenvolve rekursu umanu nasaun foun Timor-Leste nian.
Nia informa mós katak Telkom University sei fornese bolsa hamutuk 112 ba timoroan, no universidade kompromete atu forma rekursu umanus ne’ebé iha vontade emprendedorizmu.
Iha oportunidade hanesan Ministru Transporte no Comunicacões Sr. José Agostinho louva ho apoiu TELKOMCEL nian ne’ebé hola parte iha dezenvolvimentu rekursus umanus iha area telekomunikasaun nian.
“Ida ne’e nudár ezemplu ne’ebé pozitivu no konkretu, tanba fó oportunidade ba eskola no fila mai fó kedas oportunidade atu servisu, ha’u fó agradese no obrigado ba TELKOMCEL ne’ebé fó oportunidade ba timoroan sira atu ba hala’o estudu iha Indonesia,” hatete Sr. José Agostinho.
Iha konferénsia imprensa ne’e benefisiariu na’in rua ne’ebé remata ona sira nia estudu, Mario da Silva no Julino da Costa Amaral halo mós aprezentasaun kona-ba esperiénsia prosesu estudu iha universidade privadu Telkom University bainhira sira hetan bolsa iha tinan hirak liu-ba.
Hafoin halo lansamentu ba programa ne’e, tuir mai sei forma mós ekipa konjuntu ida ne’ebé sei kompostu hosi MESCC, MTC, FDCH, ho TELKOMCEL hodi halo selesaun ba dokumentu kandidatu sira nian hodi submete ba teste ne’ebé sei hala’o iha tempu besik.
Entretantu Bolsa-Estudu ne’ebé oferese hosi Kompañia TELKOMCEL – Indonesia liuhosi Telkom University, ne’e hala’o ba dala uluk iha 2014 ne’ebé oferese tiha-ona bolsa ba timoroan na’in 10 iha tempu ne’ebá, to’o ohin loron timoroan na’in 3 konsege remata ona sira nia estudu ho grau D3 no fila mai servisu ona iha kompañia TELKOMCEL Timor-Leste.
Tinan ne’e TELKOMCEL kontinua oferese tan bolsa estudu ba timoroan na’in 10 atu ba hala’o sira nia estudu iha area telekomunikasaun nian. Tuir informasaun, atu kompleta númeru tolu-nulu (30), TELKOMECEL sei fó tan bolsa-estudu ba timoroan na’in 10 iha faze tuir mai (dala ikus nian).(Media FDCH)