SURABAYA, 26/07/2017 (FDCH) Sekretáriadu Tekniku-FDCH iha papel importante ida maka atu hala’o avaliasaun no monitorizasaun ba universidade sira inklui mós hala’o avaliasaun ba progresu aproveitamentu estudante sira nian iha nasaun ne’ebé bolseiru sira estuda bá.

Tanba ne’e atu haree direita progresu no aproveitamentu bolseiru sira nian no reve mós kontratu ho bolseiru sira koordenadora Gabinete Administrasaun, Finansas no Rekursus Humanus Internus (GAFRHI) Sra. Leila ML Carceres dos Santos, akompaña hosi Téknika Jurídika FDCH nian Sra. Estefania Coreia Alves, halo vizita  ba iha Indonésia (Surabaya no Bali) durante loron lima 25-29/7/2017  hodi bele  haree, rona rasik no halo avaliasaun ba rezultadu no progresu akadémiku bolseiru sira nian ne’ebé fornese hosi universidade.

Iha vizita importante ne’e  atu buka hatene mós kona-ba vida moris bolseiru sira nian, no rona mós problema  no dezafiu sira  ne’ebé mak bolseiru sira  hasoru durante fulan hirak nia laran  bainhira sira ba iha rai Indonésia.

Durante vizita FDCH ho parte Universidade ITS halo mós  alterasaun ba Memorandun entendimentu ne’ebé asina ona antes ne’e no iha pontus balun ne’ebé mak persiza atu altera mak hanesan área estudu, numeru kada área, númeru bolseiru, health insurence, no mós kustu extensaun .

Konforme  memorandu ne’ebé asina ona entre parte FDCH no universidade  ITS determina ona katak iha áreas hamutuk 13 ne’ebé importante tebes atu bolseiru FDCH nian sei estuda bainhira sira remata sira nia kursu preparatóriu durante fulan 4 nia laran (Maiu-31 Agostu).

Maibé, atu hola parte ka integra iha áreas hirak ne’e, kompete ba ITS rasik atu koloka estudante idak-idak tuir kapasidade no rezultadu hosi kursu preparatóriu ne’ebé estudante tuir hela durante ne’e.

Entretantu, hafoin rezultadu hosi kursu ne’e rasik sai, númeru 13 ba áreas ne’ebé uluk determina ona muda fali ba 14 hodi inklui tan Tekno Elektro.área sira ne’ebé mak atu koloka bolseirus sira ba mak hanesan Teknik Geofisica, Teknik Industri, Teknik Lingkungan, Teknik Perkapalan, Teknik Biomedik, Teknik Mesin, Transportasi Laut, Teknik Kelautan, Matematika no mós Tekniku Electro.

Aleindene’e halo mós alterasaun ba kontratus bolsa estudu ho ITS no mos UNUD nian ne’ebé vigora hela,  iha okaziaun ne’e halo mos renovasaun  kontratu  entre FDCH ho bolseirus sira ne’ebé estudu iha ITS tanba sira nia kontratu remata ona iha fulan agostu.

Iha vizita ikus FDCH akompanha hosi Adidu Edukasaun Sr. Leonito, halo mos enkontru ho Estudante sira hodi koalia kona mos ba iha KITAS/Visa ba Estudante sira.

Ba dahuluk Conselho de Administração do FDCH, fó fiar ba ST-FDCH hodi bele organiza rasik programa bolsa estudu ba timoroan sira liu-liu kombatentes no veteranus nia oan sira hodi kontinua sira nia estuduliu hosi aprovasaun CA-FDCH ba despaxu Ministerial n.o 01/MPIE/I/2017, 17 Marsu, ne’ebé regula konkursu bolsa estudu ba rai-li’ur ba kombatentes no veteranus nia oan sira hodi kontinua sira nia estudu nivel Lisensiatura iha Universidade Indonésia nian hanesan Institut Sepuluh Nopember (ITS) Surabaya iha área enjinaria nian bolseiru na’in 42  no Universitas Udayana Denpasar, Bali (UNUD) iha área Medisina Vetirinária bolseiru na’in 10. (Media-FDCH)

Related Post :


Total Viewer : 1249 Views || Category: Notisia