Yogyakarta/09/06/2017(FDCH). Ministério Planeamento no Investimento Estratégico –MPIE liu hosi  Fundo de Desenvolvimento do Capital Humano  (FDCH) ho ekipa konjunta hahú hosi loron 5-09/06 2017 halo monitorizasaun ba sentru formasaun sira iha Indonézia ne’ebé durante ne’e fornese formasaun ba funsionariu públiku timoroan no estabelese mós kooperasaun ho Universitas Gadja Mada (UGM).

Ekipa konjunta ba monitorizasaun ne’e xefia direita hosi Secretário Executivo FDCH, Sr.  Isménio Martins da Silva no membru sira iha ekipa konjunta ne’e mak hanesan Coordenador ba Gabinete do Aprovisionamento no Logistíca GAPLO-FDCH, Sr. Eusebio Gusmão Barreto, Secretária Executiva da Comissão da Função Pública (CFP) Dra. Maria de Jesus Sarmento, Diretor Geral dos Finanças do Estado (DGFE) iha Ministério das Finanças (MdF) Dr. Januario da Gama,  Diretor Geral do INAP do MAE., Dr. Agustinho Letencio, Tecnico Professional ba Unidade de Planeamento, Monitorizasaun no Avaliasaun (UPMA) iha Gabinete do Primeiro Ministro (GPM).  Sr. Ageu José Cardoso, no  Coordenador Sentru Formasaun Jestaun Financeira Públika (SFJFP) iha Ministério Finanças Sr. Alberto Piedade.

Secretario Executivo FDCH Sr. Isménio Martins da Silva hateten objetivu  ba monitorizasaun ne’e mak atu implementa mandatu ida ne’ebé atribui ba iha Secretariado do FDCH hodi halo prosesu aprovisionamentu inkluindu mos halo selesaun ba Sentro de Formação sira ne’ebé iha kualidade haktuir Despacho Ministeriál husi Conselho de Administração do FDCH ho no 01/CA-FDCH/II/2016 ne’ebé espesifikamente atribui ba Secretário Executivo do FDCH hanesan Atu halo seguimentu ba rekomendasaun husi Ekipa Mini KRO hodi hatene kualidade sentro Formasaun sira ne’ebé funsionáriu estadu sira durante ne’e  partisipa ba.

Sr. Iseménio hateten liu husi monitorizasaun ne’e fó tan referénsia di’ak ba Secretariado Técnico do FDCH hodi ezekuta orsamentu no hetan impaktu rezultadu programa di’ak liu tan no membru ekipa Mini KRO atu hetan informasaun barak nune’e  ekipa bele tu’ur hamutuk fali iha fulan Agostu ka Setembru 2017 hodi deskute tan ba planu Orsamentu Jeral Estau (OJE) 2018.

Durante monitorizasaun  ekipa konjunta konsege observa direita atividade iha sentru formasaun sira hanesan SMILE Group, YES, INIXINDO, TECHNOPHORIA iha Yogakarta, Java Central,  Landi Institute iha Denpasar – Bali.

Entretantu hafoin monitorizasaun ne’e konsege extende mós akordu  kooperasaun ho Universidade Gajah Mada (UGM) nune’e bele loke oportunidade ba funsináriu sira atu ba tuir mós formasaun iha universidade ne’e.

Sr. Isménio Martins da Silva hateten  estabelese akordu kooperasaun ho  Universitas Gajah Mada (UGM)  tanba iha bolseirus pos-graduasaun sira no relasaun parseria ho UGM hahú ona dezde FDCH mosu iha 2011, ne’ebé Fundo ne’e finansia ona bolseirus pos-graduasaun 25 liu-liu hosi programa bolsa estudu organiza hosi INAP (Instituto Nacional da Adminitração Pública) ne’ebé tuteladu iha Ministério da Administração Estatal (MAE).

Tan ne’e ma’ak husi Secretariado do FDCH hakarak extende tan akordu parceria ne’ebé existe ona atu kontinua hodi hakarak espressa interrese hodi bele mós estabelese akordu iha formasaun ba tempu badak ka nível sertifikadu liu-liu ba iha áreas níveis médiu no avansadu, hanesan áreas formasaun ba e-government, programa desentralizasaun, jestaun finansas, akuntabilidade no sira seluk tan.

 

 

Durante diskusaun mós, konkorda katak, depois husi MAE, CFP no MdF hamutuk ho Secretariado do FDCH sei explora liu tan possibilidades servisu hamutuk ida ne’e no sei komunika diretamente liu husi Director of Partnership, Alumni and International Affairs UGM nian – Dr. Anna Marie Wattie, M.A.

Ekipa konjunta ninia rekomendasaun hafoin vizita ne’e mak uainhira identifika ona area balun di’ak la presiza ona haruka formandus ba SMILE Group, YES ka Technophoria se karik UGM mos fornese kursu ne’ebé bele iha kualidade kompara ho sentru formasuan seluk.  Sei identifika didi’ak atu nune’e bele iha aproveitamentu ne’ebé di’ak no benefisia Timor-Leste ho kustu ne’ebé razoavel. (Media FDCH)

Related Post :


Total Viewer : 867 Views || Category: Notisia