Dili,15/08/2017 (FDCH) Prezidente Repúblika Dr. Francisco Guterres “Lu Olo” realiza sorumutu ida ho Fundo de Desenvolvimento do Capital Humano (FDCH) atu haree no rona rasik progresu dezenvolvimentu rekursus umanus Timor-Leste no mekanizmu atu apoiu no fó formasaun ba timoroan sira.
Enkontru Secretário Executivo FDCH Sr. Isménio M. da Silva ho Prezidente da Republika Dr. Fancisco Guterres Lu-Olo ne’e akompaña hosi asesor sira GPR nian hanesan Dr. Roque Rodrigues, Dra. Aicha Basarewa, Sr. Harold no Sra. Filomena de Almeida no hosi parte FDCH nian akompaña mós hosi Coordeandora GAFRHI Sra. Leila Carceres no Xefe Departamentu Media no Relasaun Públiku Sr. Antonio Febu.
Enkontru ne’e hahú loke ho natureza fundu ninian no oinsa atu asegura formasaun ba públiku timoroan no funsionariu sira inklui funsionariu Gabinete Prezidensia Repúblika nó mós solisita se karik iha verba ruma hodi bele fó apoiu ba resposta pedidus apoiu estudu ninian ne’ebé mai husi públiku timoroan sira.
“Iha okaziaun ne’e diskuti mós posibilidades atu oin nusa mak iha futuru parte Gabinete Presidensial ho FDCH buka meius hodi responde ba pedidu individuais ne’ebé Prezidente simu iha inísiu mandatu ne’e,” hatete Sr. Isménio M. da Silva.
Sr. Isménio M. da Silva hateten Orsamentu Jeral Estadu (OJE) ba 2017, ba Gabinete Prezidensia Repúblika (GPR) iha $55,000 ne’ebé aloka ba atividades formasaun funsionárius GPR nian. Maske orsamentu ne’ebé atribui ba GPR, foin ma’ak gasta 11% ($6,000) maibe iha dalan atu bele halo transferénsia de verba (virement) se wainhira GPR iha prioridade mós atu aloka ba apoiu estudantes timoroan sira.
“Husi perspetiva tékniku katak iha prosedimentu ne’ebé existe hodi assegura prioridades hosi Estado no Governu iha ambito ba desenvolvimento ba rekursus umanus”. Haktuir Secretário Executivo FDCH
Iha okaziaun ne’e Prezidente Repúblika hakarak rona mós perspetiva husi FDCH kona-ba assunto kazu Estudantes bolseirus Timoroan iha Cabo-Verde.
“Ha’u responde katak, iha dia 03 de Agosto 2017, MECAS e Ministro da Educação S.E. Dr. Antonio da Conceição ho ekipa FDCH ba hasoru S.E. Dr. Rui de Araújo, Primeiru Ministru da RDTL hodi informa no relata rezultadu vizita hosi ekipa Ministério da Educação e FDCH ba Cabo-Verde husi dia 05 – 21 de Julho 2017,” hatete Sr. Isménio
FDCH Informa ba Prezidente da Repúblika katak, S.E. Primeiru Ministru konkorda ho proposta Ministru Edukasaun nian atu koloka tékniku (assistente de Adido) ida iha Cabo-Verde hodi akompaña lalaok estudantes nian no mós observa situasaun siguransa antes atu foti desizaun seluk.
Se karik, estudantes bolseirus 19 husi totál 43 ne’ebé hakarak fila mós, tuir regras no procedimentos ba bolsas de estudo tenki tuir fali concurso ka seleisaun por mérito hodi ba estuda fali iha Uinversidades seluk iha países ne’ebé deit.
Presidente da República fo’o hanoin mos katak importante atu hare assunto ne’e ho didiak, no ba futuru tenki hare kualidade Universidades sira, hanesan S.E. Ministro do MPIE ne’ebé toka bebeik ba kualidades universidades iha mos rai-laran.
S.E. Presidente da República hato’o katak, sei nafatin fiar ba governo liu husi S.E. Primeiro Ministro hodi bele hare didiak assunto ne’e diak tamba sei hare ba utilizasaun orsamentu do estadu hodi assegura jovens sira liu husi programa ne’e, no ao mesmo tempu haree mós Cabo-Verde nu’udar país irmão iha CPLP.(Media FDCH)