Dili, 1/08/2018. Sekretáriu Ezekutivu Fundo de Desenvolvimento do Capital Humano (FDCH) Isménio Martins da Silva hasoru malun ho Xefi Ezekutivu Telkomcel Yogi R. Bahar iha ninia servisu fatin resintu Palácio do Governo, Dili.

Sorumutu durante oras 1 nia-laran ne’e diskute liu bá posibilidade kompañia telekomunikasaun refere  atu oferese bolsa-estudu ba timoroan nain 10. Atu to’o ne’ebá Yogi Bahar konfesa katak presiza iha koordenasaun ho instituisaun estadu nian liuliu FDCH nuudar istituisaun ne’ebé lei fó dalan atu jere no koordena programa sira bolsa-estudu nian ba timoroan hotu haktuir Dekretu Lei N.o 12/2011.

Tuir planu, programa bolsa-estudu ne’ebé Telkomcel sei oferese maka “área telekomunikasaun”. Tanba ne’e kompañia refere loke diskusaun no koordensaun ho FDCH atu bele hetan referénsia ruma konabá sistema inklui mekanismu rekrutamentu bolseirus tuir padraun legais nian.

Hataan ba ida-ne’e Sekretáriu Ezekutivu FDCH Isménio Martins da Silva hatete katak sei koordena liutan ho ministériu relevante liuliu Ministériu Transporte no Telekomunikasaun para bele identifika prioridade iha área telekomunikasaun saida deit mak  presiza atu dezenvolve, nune’e Isménio hatutan tan katak bolseirus sira ne’ebé bá estuda bele prienxe nesesidade dezenvolvimentu Timor-Leste nian iha futuru mai. (Média FDCH)

Related Post :


Total Viewer : 2495 Views || Category: Notisia