Oe-Cusse, 27/3/2018 Fundo de Dezenvolvimentu do Capital Humano (FDCH) realiza programa sosializasaun no konsultasaun ba Areas pontesialidade no prioridade ba dezenvolvimentu rekursus Umanus ba ikus nian iha Rejiaun Administrativa Espesiál Oe-Cusse Ambeno (RAEOA).
Serimónia ida ne’e realiza iha salaun enkontru Administrasaun ESTATAL Rejiaun Administrativa Espesiál Oe-Cusse, iha loron 27 Marsu 2018 liu ba.
Secretário Executivo FDCH Sr. Isménio Martins da Silva iha nia diskursu hateten katak FDCH hetan instrusaun, orientasaun hosi na’in ulun sua exelénsia Primeiru Ministru para atu bele, atu revee fali, atu avalia planu ba polítika ba iha dezenvolvimentu rekursu umanus iha Timor-Leste, ho sentidu katak atu haree ba iha dadus ezisténsia ne’ebé mak iha liuliu ba area dezenvolvimentu rekursus umanus.
Tuir Secretário Executivo FDCH dala barak ita rona beibeik katak Timor-Leste falta rekursus umanus maibé Realidade Ita nia rekursus ne iha tiha ona, agora atu hanusá para ita bele ajuda ita nia governu, estadu, atu bele dezenvolve polítika ida di’ak, hanoin persijamente mós ita hotu-hotu nia kontribuisaun.
“Ami mai iha RAEOA para atu bele hamutuk ho exelénsia sira ita atu bele haree took fó sujestaun ba malu liuliu iha Oe-Cusse ida ne’e,” hateten Secretário Executivo FDCH Sr. Isménio Martins da Silva.
Secretário Executivo ne’e hatutan katak ba oin FDCH prontu atu rona hosi exelénsia sira hosi estrutura tomak iha RAEOA-ZEEMS hodi nune’e ba oin bele apoiu malu di’ak liu tan hodi dezenvolve rekursu iha rai doben RAEOA ZEEMS.
Entretantu Prezidente Interinu RAEOA Sr. Arsenio Bano iha ninia diskursu espresa katak ho aprezentasaun ne’ebé haló hosi FDCH ne’e bele tulun Oe-Cusse.
“Ita hanesan rejiaun ha’u hein katak depois de ita simu fila fali lista naran sira be Oe-Cusse oan sira ne’ebé ba benefisia tiha ona programa ne’e depois ita buka tuir took agora sira iha ne’ebé no sira halo saida”. Hateten Prezidente Interinu RAEOA Sr. Arsenio Bano.
Prezidente Interinu RAEOA Sr. Arsenio Bano hatutan katak hirak ne’ebé benefisia ona programa ida ne’e, entaun husu ba an rasik katak ba tiha ona tinan rua, tinan ida, hetan ona apoiu hosi estadu hodi haló ona kursu, fila fali mai tenke halo saida.
Iha ninia diskursu nia mós husu ba partisipante sira atu identifika took problema sira ne’ebé karik iha, liuliu iha formasaun de’it ka problema ne’e mós tenke muda mentalidade.
Sekretáriu Regional Administrasaun RAEOA Sr. Fransisco Xavier Marques, iha nia diskursu husu ba partisipante sira atu hato’o ou identifika prioridades saida de’it mak rejiaun Oe-Cusse iha.
“Ohin ita mai atu rona rezultadu peskiza ne’ebé FDCH hala’o ona, iha biban ida ne’e mós hakarak hato’o liuliu direitores rejionais, xefe departamentu balun, I seluk-seluk tan atu mós hato’o ita nia prioridades ou identifika, prioridades saida maka ita presiza, nune’e ba oin governu bele toma atensaun”. Hateten Sekretáriu Regional Administrasaun RAEOA Sr. Fransisco Xavier Marques.
Objetivu hosi programa sosializasaun ida ne’e mak atu identifika prioridades ba dezenvolvimentu Rekursus umanus iha munisipiu sira inklui mós iha RAEOA ne’e no mós atu aprezenta dadus ne’ebé mak FDCH rekolla no ho esperansa sei hetan hikas sujestaun balun tan hodi nune’e bele haree ba prioridades kada munisipiu ne’e saida mak FDCH bele halo iha futuru.
Programa sosializasaun ida ne’e rasik aprezenta hosi konsultór FDCH nian Sr. Afonso de Almeida, ne’ebé mak Durante ne’e ajuda hela FDCH hodi haree kona-ba dadus sira ne’ebé mak FDCH rekolla ona liu hosi Levantamentu Dadus Rekursus Umanus Ezistentes 2016 liu ba.
Hafoin aprezentasaun kontinua kedan ho fahe partisipantes sira ba iha grupu haat hodi diskute kona-ba prioridades dezenvolvimentu rekursus Umanus iha RAEOA ne’e nian hodi haree ba area kualifikasaun ne’ebé presiza dezenvolve.
Antes ne’e iha loron 09 Marsu 2018 FDCH halo abertura Programa sosializasaun no konsultasaun ba Areas pontesialidade no prioridade ba dezenvolvimentu rekursus Umanus iha munisipiu Liquisa no tuir kedan ho programa ne’ebé hanesan iha mós munisipiu sira seluk iha territóriu Timor-Leste nia laran no ikus mak programa ida ne’e taka iha RAEOA.
Partisipantes iha Programa Sosializasaun ida ne’e Prezidente Interinu Autoridade RAEOA, Sekretáriu Regional Administrasaun, Diretór sira, Xefe Departamentu sira, Jestor sira, DD PNDS, Relijioza, sosiedade sivíl no seluk-seluk tan.( Media FDCH)