Programa ne’e iha objetivu atu finansia Liñas Ministeriais (LMs) hodi prepara no hasa’e kompeténsia ka skills Timór-Oan sira nian, liu-liu joven  feto no mane, bazeia ba ejijénsia merkadu traballu. Maioria orsamentu ba programa SEPFOPE ninian integra hotu iha programa ne’e. Grupus benefisiárius  ba programa ne’e la’os de’it funsionárius estadu maibé públiku Timór-Oan hotu. Dezde 2011 to 2015, orsamentu ne’ebé uza ona ba formasaun ida ne’e mais de 30 milloens no fó benefisiu ba mais de 10 mil benefisiárius.

Programa ne’e fó apoiu tomak ba dezenvolvimentu kapasidade funsionárius estadu ka ajentes estadu tomak, liuliu ba formasaun espesializada atu hadi’a liután sira-nia kapasidade, kompeténsia no matenek hodi kontribui no fasilita di’ak liután sira-nia servisu tuir áreas ida-idak.  Dezde 2011 to 2015, orsamentu nebe uza ona ba formasaun ida ne’e mais de 12 milloens no fó benefisiu ba mais de 14 mil benefisiárius.

Programa ne’e benefisia Timór-Oan hotu, tantu husi setór públiku, setór privadu no mós Timór-Oan hotu atu bele kontinua sira nia estudu. Dezde 2011 to 2015, orsamentu ne’ebé uza ona ba bolsa estudu ida ne’e mais de 70 milloens no fó benefísiu ba mais de 3 mil benefisiárius ne’ebé espalha iha nasaun oi-oin inklui ho Timor-Leste ho nivel estudu varia husi Diploma (D1) to’o Doutoramentu (S3). Kuaze maioria númeru bolseirus mai husi Ministériu Saúde.

Programa ne’e hodi fó apoio ba Institusaun Seguransa, Defeza no Ministériu Públiku. Iha mós Linhas Ministeriais balun ne’ebé ninian programa kapasitasaun inklui mós iha tipu formasaun ne’e. Programa ne’e hanesan mós programas sira seluk, aprezenta proposta no hetan aprovasaun husi CA-FDCH. Dezde 2011 to 2015 orsamentu nebe uza ona ba formasaun ida ne’e mais de 25 milloens no fó benefisiu ba mais de 6 mil benefisiarius.