Díli, 11/6/2019, Sekretáriu Ezekutivu Fundo de Desenvovimento do Capital Humano (FDCH) Sr. Isménio Martins da Silva akompaña hosi koordenadora GAFRHI Sra. Leila Carceres halo sorumutu ida ho Sekretáriu Estadu ba Asuntus Kombatentes Libertasaun Nasionál ( SEAKLN) Sr. Gil da Costa Monteiro “Oan Soru” iha edifísiu Sekretáriu Estadu Caicoli Dili.
Objetivu hosi sorumutu ne’e atu esplika kona-bá servisu FDCH nian nomós planu ba 2020 ne’ebé mak FDCH prepara ba veteranus, martires no kbiit-laek sira nia oan liuhusi programa bolsa-estudu.
Atu implementa planu sira ho diak, tan ne’e iha tempu hanesan, FDCH mós husu disponibilidae SEAKLN nian atu bele fornese dadus veteranus no martires ne’ebé iha mai FDCH nune’e bele halo uluk identifikasuan inisiál.
Iha sorumutu ne’e Sekretáriu Ezekutivu FDCH informa katak iha tinan 2020 FDCH sei iha planu hodi fó apoiu ba veteranus, martires inklui kbiit-laek sira nia oan liuhusi programa bolsa-estudu iha rai-laran no rai-liur. Tuir informasaun iha tempu badak FDCH sei hasoru-malu ho Ministra Solidaridade Sosial no inkluzaun hodi ko’alia kona-bá asuntu refere.
“Husi programa ne’ebé mak FDCH iha, planu annual ba 2020 FDCH sei apoiu mós veteranus no Sobreviventes masakre sira nia oan liuhusi programa bolsa-estudu iha rai-laran nomós iha rai-liur tan ne’e FDCH persija dadus kompleta ba Veteranu, kombatentes no martires sira ne’ebé mak Sekretaria Estadu ba Asuntus Kombatentes Libertasaun Nasionál iha hodi sai referénsia ba FDCH iha future mai. Esplika Sr. Isménio.
Hatán ba ida-ne’e Sekretáriu Estadu Sr. Gil da Costa Monteiro “Oan Soru” hato’o ninia agradesimentu ba FDCH tanba tau ona planu orsamentu SEAKLN nian ba tinan 2020. Maske nune’e Governante ne’e mós sujere atu programa bolsa-estudu refere fó liu importánsia ba veteranus sira nia família direita (fén ho oan rasik) tanba tuir nia, rekezitus ne’e bazeia ba Dekretu Lei konabá Pensaun Sobreviventes ne’ebé hatete katak sira (fen no oan rasik) mak iha direitu atu hetan tratamentu saúde no apoiu sira mak hanesan bolsa-estudu no seluk tan.
“Iha artigu 27 pensaun sobreviventes hatete direitu sei bele ba nia fen no oan sira iha númeru 2 ne’e dehan “Os Filho minoridade e maioridade ida-ne’e mak iha direitu atu hetan subsídiu ba atendimentu ba saúde no subsídiu sira seluk tan. Esplika governante ho kódigu Oan-Soru ne’e.
Konabá dadus sira, Oan soru kompremetidu atu fornese dadus rejistu antigu kombantentes, veteranus no mártires ne’ebé mak iha ba ST-FDCH nuudar kontribuisaun dezenvolvimentu tuir planu orsamentu ne’ebé FDCH perpara ba tinan 2020. (Média FDCH)