Dili, 9 Marsu 2022, Sekretáriu Estadu Formasaun Profisionál no Empregu (SEFOPE ) Sr. Alarico do Rosário ho Diretor Ezekutivu Fundo Desenvolvimento do Capital Humano (FDCH ) Dr. Cristóvão dos Reis asina Memorandum of Understanding (MoU) ho Prezidente Korean Studies and Languages Program (KSLP) Sr. Lee Jae Kwon iha salaun enkontro SEFOPE – Caicoli Dili .
Liu hosi asina MoU ne’ebé Governu ho KSLP estabelese ho objetivu hodi kontinua fó formasaun lian Koreia ba foinsa’e timoroan sira ne’ebé iha intrese ba servisu iha nasaun Koreia sul.
Sekretáriu Estadu Formasaun Profísionál no Empregu SEFOPE , Sr. Alarico do Rosario hatete akordu kooperasaun ne’ebé Governu Timor-Leste halo ho KSLP hahú kedas iha 2012 ne’ebé fo ona formasaun lian Koreia ba foinsa’e timoroan sira hodi ba servisu iha nasaun Koreia iha area oin-oin.
“Akordu kooperasaun ho KSLP ita hahú kedas iha 2012, tan ne’e ohin ita hahú fila-fali hodi fó kapasitasaun lian Koreia nian ba Timoroan sira,ne’ebe mak iha intrese sira ba servisu iha Koreia,” dehan Sekretáriu Estadu ne’e
Entretantu Diretur Ezekutivo FDCH DR. Cristoão dis Reis iha nia intervensaun hateten parte FDCH konkorda atu extende kontratu ho KSLP ba fulan neen no FDCH sei halo mós avaliasaun ba programa KSLP nian iha futuru .
“FDCH konkorda extende kontratu ne’e ba fulan neen no Ami husu atu prepara ekipa ida ne’ebé kompostu husi FDCH no SEFOPE hodi halo monitorizasaun no avaliasaun ba programa formasaun KLSP nian ne’e iha futuru ,” hateten Diretór Ezekutivu FDCH.
Programa formasaun lian Koreia ne’ebé implementa husi KSLP ne’e realiza tanba hetan finasiamentu husi FDCH liuhusi SEFOPE, hahú husi 2012 mai to’o ohin loron timoroan lubuk ida mak konsege tuir ona formasaun lian Koreia hodi ba hala’o servisu iha nasaun Korea Sul hodi kontribui ba redusaun númeru dezempregu iha ita nia país Timor-Leste.
Partisipa mos iha enkontru asinatura MoU ne’e Koordenador GAPPEFIV-FDCH Sr. Hermenegildo da Silva no kargu diretór sira iha SEFOPE. (Media_FDCH)