Díli,24/10/2019, Sekretáriu Ezekutivu Fundo de Desenvolvimento do Capital Humano (FDCH) Sr. Isménio Martins da Silva simu iha ninia gabinete Diretór Assosiasaun Defisiénsia Timor-Leste (ADTL) Sr. Cesario da Silva ne’ebé akompaña mós husi Diretór Ezekutivu Assosiasaun Halibur Defisiénsia Matan iha Timor Leste(AHDMTL) Sr. Gaspar Afonso ho ekipa.
Objetivu hosi prezensa ADTL mai FDCH hodi ko’alia kona-ba posibilidade sira oinsá ema ho defisiénsia bele asesu mós mai iha FDCH bainhira sira hala’o sira ninia estudu iha nivel ensinu superior.
Iha enkontru ne’e Diretór ADTL Sr. Cesario da Silva aprezenta situasaun ne’ebé durante ne’e membru ADTL sira enfrenta ba Sekretáriu Ezekutivu FDCH kona-ba difikuldade balun ne’ebé estudante defisiénsia sira enfrenta durante hala’o sira nia estudu no atividade sira seluk tan.
Nune’e mós Diretór Ezekutivu AHDMTL Sr. Gaspar Afonso hateten husu oinsá iha futuru sira bele asesu mai iha FDCH no hetan apoiu hanesan sira seluk.
“Ami la-bele la’o mesak, presiza mós ita hotu nia apoiu malu no tulun malu hodi bele atinje ami nia mehi, ami defisiénsia matan la signifika ami la-bele halo buat ida ,” dehan Gaspar Afonso
Hatán ba preokupasaun hirak ne’e Sekretáriu Ezekutivu FDCH Sr. Isménio Martins da Silva hatete pedidu husi ADTL iha tempu besik ne’e FDCH seidauk bele apoiu maibé planu atividade ba futuru nian FDCH sei buka meius nesesáriu hodi bele ajuda.
Partisipa mós iha enkontru ne’e Koordenadora GAFHRI Sra. Leila Carceres akompaña mós Koordenador Interinu GAPPEFIV Sr. Hermenegildo da Silva , Jurista FDCH Sra. Estefania Correia no membrus husi ADTL nian . (Média FDCH)