Dili, 22/6/2018. Sekretáriu Ezekutivu Fundo de Desemvolvimento do Capital Humano (FDCH) semana ida-ne’e (22/6) simu pilotu timoroan nain lima iha ninia servisu fatin. Molok ne’e pilotu sira hetan bolsa-estudu FDCH liuhosi Ministériu Edukasaun atu hala’o estudu konabá pilotu nian iha Bangkok Aviation Center, Tailándia.
Objetivu husi sorumutu ne’e maka husu FDCH nian posibildade atu bele finansia programa medical check-up iha Tailándia molok hetan lisensa atu lori aviaun.
José Nívio Soares, ida husi pilotu nain 5 iha ninia intervansaun hatete katak agora daudaun pilotu nain 5 ne’e hala’o hela knaar nuudar voluntáriu iha Autoridade Aviaçao Civil de Timor-Leste (AACTL), maibé nuudar ema ne’ebé hasai kursu pilotu, nesesáriu tebetebs atu opera aviaun ho rutina.
“Ami agora voluntáriu hela iha AACTL, maibe atu semo ho aviaun ami presiza hetan lisensa médiku husi autoridade kompetente”. dehan eis graduadus ne’e durante aprezentasaun proposta.
Iha sorin seluk Sekretáriu Ezekutivu FDCH Sr. Isménio Martins da Silva konsidera proposta husi pilotu nain 5 (lima) ne’e importante tebetebes, no sei deskute liutan atu hetan apoiu finanseira.
“Sertifikadu médiku atu hetan lisensa ba kaer aviaun ne’e importante tebetebes, tanba ne’e ami sei haree no diskute klean liutan oinsa atu finansia ba imi nia programa ida-ne’e”. dehan lideransa másimu FDCH ne’e durante ninia intervensaun.
Proponentes sira maihusi pilotu timoroan nain 5 mak hanesan; Angelino António, Januario L. Lopes, Silvano da Silva Ribeiro, José Nivio Soares no João Borges Soares. (Media FDCH)