DILI,28/2/2017(FDCH) Secretário Estado Política Formacão Profesionál no Emprego (SEPFOPE ) ho Secretário Executivo Fundo de Desenvolvimento do Capital Humano (FDCH )  asina Memorandum of Understanding (MoU) hodi renova kooperasaun ho Korean Studies and Languages Program (KSLP) atu kontinua fó formasaun lian Korea nian ba kandidatu traballadór  Timor-oan sira molok ba servisu iha Korea.

Serimónia asina MoU ne’ebé realiza iha sala Knua Buka Hatene SEPFOPE – Caicoli ne’e asina direita husi sekretáriu estadu Ilidio Ximenes da Costa, Secretario Executivo FDCH Ismenio Martins da Silva ho diretór KSLP  Mr. Lee Jae Kwon.

Iha diskursu Sekretáriu Estado Polítika Formasaun  Professional no Empregu Ilidio Ximenes hatete objetivu husi akordu ne’e atu kontinua   fó espasu ba mestre sira lian Korea nian atu fó formasaun ba Timor-Oan sira molok ba servisu iha Korea.

Ilidio Ximenes apresia tebes servisu hamutuk entre SEPFOPE, FDCH ho KSLP  hodi prepara Timor-oan sira ba servisu iha rai li’ur tanba haree ba estatístika númeru traballadór kada tinan sempre aumenta ba beibeik.

“Ha’u fó obrigadu barak tanba haree ba estatístika ne’ebé iha, hahú husi 2012 ita haruka de’it ema na’in 53 maibé hafoin ida ne’e iha 2013 ita haruka 280, iha 2014 ita haruka tan  246 ne’ebé tun uitoan maibé númeru ne’ebé boot liu mak iha 2015  ho total 417 no 2016 nian  506,”Dehan secretario estadu ne’e hodi apresia servisu ne’ebé durante ne’e parte relevante sira hala’o.

Secretario estadu ne’e husu ba ninia diretór sira atu halo koordenasaun ho Sentru Formasaun tolu hanesan Don Bosco, Becora no Tibar atu hahú fó tan  formasaun lian Korea ba Timor-Oan sira tanba traballadór sira ba servisu iha rai li’ur kontribui maka’as ba dezenvolvimentu ekonomia iha sira ninia família.

Iha fatin hanesan diretór KSLP Mr. Lee Jae Kwon hateten sira kontinua prontu atu fó formasaun ba kandidatu traballadór nune’e sira ba servisu iha Korea labele hasoru difikuldade iha lingua.

“Ita sei halo esforsu tomak atu hanorin ho di’ak ba Timor-oan sira atu ba servisu iha Korea, maske iha Korea iha situasaun ne’ebé diferente tebes ho Timor-Leste,” dehan nia

Mr. Lee Jae Kwon informa ohin loron iha nasaun barak mak iha interese atu haruka ninia  traballadór sira  ba servisu iha Korea tanba ne’e KSLP sei esforsu atu fó formasaun iha area lian nian ho di’ak ba kandidatu traballadór sira molok atu ba servisu.

Akordu kooperasaun ne’ebé estabelese ne’e ninia durasaun ba tinan rua ne’ebé hahú husi  1 Janeiru  2016 no sei termina iha 31 Dezembru 2018.

Entretantu Secretário Executivo FDCH Isménio Martins da Silva apresia ho SEPFOPE ninian servisu tanba konsege haruka Timor-oan lubuk ida ba servisu iha rai li’ur.

“Sempre sente orgullu ba servisu sira ne’ebé SEPFOPE halo liu-liu ba programa servisu hamutuk mão de obra iha estranjeiru, ha’u hanoin servisu ida importante   husi númerus ne’ebé atinje ona 2.550 trablladores ne’e la’ós buat fasil atu bele organiza,” dehan Seceretario Executivo Isménio Martins da Silva.

Husi parte FDCH nian liu husi Konsellu Administrasaun FDCH ne’ebé SEPFOPE mós nu’udar membru permanente, tinan-tinan maske ninia orsamentu sempre tun husi 30-40% maibé FDCH  kontinua tenta atu finansia. Enkuantu tinan 2017 FDCH aloka orsamentu kuaze 2 miloens ba SEPFOPE ba area Formasaun Profisionál.

“Ami tenta hela buka orsamentu balun ne’ebé talves tinan ne’e sei iha balun mak la konsege ezekuta karik ami tenta para taka tiha orsamentu balun ba iha programa ida ne’e,  tanba ejijénsia ne’ebé ita iha intermus de jestaun finanseiru públiku lei ne’ebé atribui ba FDCH iha regra de pagamentus,” dehan Secretario Executivo ne’e.

Secretrio Executivo ne’e mós kontinua husu ba KSLP atu hatudu relatóriu ne’ebé kompletu no kontratu ho ninia funsionáriu sira mós tenke transparente atu nune’e orsamentu ne’ebé aloka ba ninia retornu tenke iha.

Polítika governu nian haruka Timor-oan sira ba servisu iha rai li’ur atu redús númeru dezempregu ne’ebé nasaun ne’e hasoru ohin loron nune’e mós atu kontribui ba dezenvolvimentu ekonomia família nian. (Media FDCH)

Related Post :


Total Viewer : 936 Views || Category: Notisia