DILI,2/2/2017(FDCH) Secretário Executivo  Fundo de Desenvolvimento do Capital Humano (FDCH), Isménio Martins da Silva ho nia ekipa halo sorumutu dahuluk ho Diretór Asuntu Kombatentes Libertasaun Nasionál, Ministério Solidariedade Sosiál (MSS), Joaquim Carvalho de Araújo hodi diskute preparasaun no servisu hamutuk ba rekrutamentu  bolseru  Kombatentes no Veteranus sira nia oan.

Secretário Executivo FDCH, Isménio Martins da Silva hatete iha tinan ne’e sei fó bolsa estudu ba Veteranus no  Kombatentes nia oan hamutuk na’in  52 ne’ebé sei ba hasai lisensiatura (S1) iha Indonézia tanba ne’e importante tebes atu halo dikusaun ho MSS.

“Iha ne’ebá senhor ministru MPIE Kay-Rala Xanana Gusmão deside katak hakarak involve ita boot sira mós sai hanesan ekipa de juri,  kriteriu espesifiku mak liu –liu ba Veteranus nia oan rasik, subriñu subriña la iha no bei-oan la iha, nia tenke tuir duni fisa ne’ebé mak iha,”dehan Secretário Executivo Isménio Martins da Silva.

Universidade ne’ebé FDCH hili atu timoroan sira ne’e ba hala’o sira nia estudu ba mak hanesan  Universidade ITS Surabaya ne’ebé sei hala’o estudu iha area enjiñaria no iha area veternaria nian sei hala’o iha Universidade Udayana Bali (UNUD)-Indonézia.

Kriteria ba sira ne’ebé atu aplika ba bolsa estudu ne’e tenke iha valor di’ak iha departementu Siensia Naturais tuir sertifikadu ikus Ensino Secundario nian.

Entretantu Diretór Asuntu Kombatentes Libertasaun Nasionál Ministério Solidariedade Sosiál (MSS), Joaquim Carvalho de Araújo konkorda atu servisu hamutuk ho FDCH nune’e bolsa estudu ne’e tenke fó duni ba Veteranus no  Kombatentes sira nia oan no sujere atu halo rekrutamentu ba bolseru sira ne’e tenke ho rigorozu.

Diretór ne’e mós informa númeru Veteranos no  Kombatentes ne’ebé ohin loron rejistu hamutuk 200 mil resin nune’e governu konsege konsidera ona balun maibe balun seidauk konsidera tanba ne’e sira ne’ebé Governu seidauk konsidera barak mak sempre reklama sira nia direito.

Enkontru ne’ebé hala’o durante oras rua resin husi parte FDCH lidera direita husi secretario executivo Isménio Martins da Silva ne’ebé akompaña husi konsultora téknika Ana Paula dos Santos, Diretór SEPEFI Paulo M. dos Santos no Coordenadora Administrasaun e recursos Humanos Interna Leila C. dos Santos nune’e mós husi parte MSS nian  partisipa husi Diretór Asuntu Kombatentes Libertasaun Nasionál, Joaquim Carvalho de Araújo ho nia asesor.(Media FDCH)

Related Post :


Total Viewer : 2391 Views || Category: Notisia