Dili, 16/2/2018 Secretário Executivo Fundo de Desenvolvimentu do Capital Humano FDCH Sr. Isménio Martins da Silva akompaña hosi koordenadór no xefe Departamentu sira simu vizita ekipa ida hosi Universitas Air Langa Indonesia ne’ebé akompaña mós hosi adidu edukasaun Indonesia mai Timor -Leste Sr. Sedercor Melatunan hodi ko’alia kona-ba kooperasaun servisu entre instituisaun rua ne’e.
Durante enkontru ne’ebé hala’o iha salaun Knowledge Center edifísiu FDCH ne’e parte UNAIR aprezenta programa estudu universidade ne’e nian iha área sira hanesan Siénsia espesialista ba Saúde Mental, Espesialista ba Nehan nian Siénsia Turizmu, Siénsia Psikolojía no Siencia de Lingua.
Parte rua ko’alia mós kona-ba kooperasaun entre instituisaun rua ne’e hodi servisu hamutuk atu haree ba programa bolsa estudu ne’ebé universidade ne’e sei fornese ba timoroan sira iha area oin-oin hahú hosi lisensiatura to’o ba doutoramentu.
Alende bolsa estudu universidade ne’e buka mós oportunidade atu halo kooperasaun ho ministériu relevante sira atu haruka timoroan sira ba hala’o sira ninia estudu iha UNAIR, no ko’alia mós kona-ba oinsá atu fasilita programa universidade nian Kulia Kerja Nyata Internasional (KKN) ne’ebé sira hili mós Timor-Leste nu’udar nasaun viziñu ida atu husik sira nia estudante atu mai hala’o estájiu.
Hafoin rona tiha aprezenta hosi Universidade Secretário Executivo FDCH Sr. Isménio Martin da Silva hateten informasaun ne’ebé simu FDCH sei aprezenta ba liña ministeriais nune’e sira mak sei bele deside atu estabelese kooperasaun servisu no bele haruka mós timoroan sira ba hala’o sira nia estudu iha UNAIR.(Media FDCH)