Portugal. 18/05/2016(FDCH) Sekretariadu Tékniku FDCH Vizita Bolseiru no Revee Koperasaun ho Universidade 5 iha Portugal.
Asuntus hanesan Lingua Portugues, Sistema Bologna, Pagamentu Tarde ligadu ho mudansa sistema finansa iha Timor-Leste inklui asuntus seluk hanesan subsidiu ba estudantes naun bolseiru no subsidiu ba peskiza doutoramentu nian mak levanta husi estudante sira durante sorumutu iha universidade 5 hanesan Universidade do Minho, Universidade Aveiro, Universidade Coimbra, Universidade Nova Lisboa no Universidade Évora.
Enkuantu objetivu prinsipál husi vizita ne’e atu hetan mós rezultadu husi ezekusaun orsamentu FDCH ne’ebé atribui ba Ministériu Edukasaun iha programa atu haruka fila bolseirus.
Nune’e mós atu revee fali mekanismu koperasaun ho universidades ne’ebé estabele husi UNTL no Ministériu Edukasaun iha nivel lisensiatura, mestradu no doutoramentu nian.
Iha tempu hanesan ekipa avaliador mós sei avalia dezenpeña akademiku husi bolseiru sira ne’ebé halao hela estudu iha Portugal.
Durante vizita ofisiál ne’ebé halao husi Sekretariadu Tékniku FDCH inklui ho UNTL, Gabinete Bolsa Estudu Ministériu Edukasaun, Diresaun Inspesaun no Auditoria Interna Ministeriu Finansa no Gabinete Adidu Edukasaun RDTL iha Portugal konklui katak Presiza hadia mekanismu koperasaun ho universidade iha portugal ho nune’e orsamentu propinas sei haruka ba univeridade no kustu de vida sei haruka direta ba bolseiru sira nia konta tuir lei finanseiru Timor-Leste haktuir.
Sei followup fali pedidu ba subsídiu individuais no estudantes finalista sira ne’ebé atu halo teze ba estudantes naun bolseiru sira.
Enkuantu husi Parte UNTL no Ministériu Edukasaun kontinua hare kapasidade lingua portuges ba estudantes bolseiru sira no parte FDCH sei hare kustu ruma atu fó oportunidade ba estudante sira hakerek ho diak remata estudu ho kualidade tuir nivel lingua ne’ebé rekere husi universidade.
Ekipa Avaliador mós konklui katak kustu de vida nebe mak fó ba bolseiru sira mais sufisiente maibe fila-fali ba bolseiru sira mak tenki jere ho diak atu nune’e finaliza estudu ho diak hodi fó mós oportunidade ba maluk timor oan seluk atu estuda.
Ekipa avaliadór kompostu husi Sekretariu Ezekutivu FDCH Sr. Isménio Martins da Silva, Diretór Planeamentu Peskiza no Fiskalizasaun FDCH Sr. Paulo Miguel Dos Santos, Konsultora Téknika FDCH Sra. Ana Paula dos Santos, Reprejentante Gabinete Bolsa Estudu Ministeriu Edukasaun Sr. Guilherme Cardoso Mau, Auditór Interna Ministeriu Finansa Sr. João Bosco. Pro Reitor UNTL Sr. Aniceto Serrão no DG UNTL Sr. Jacinto Belo. Sorumutu ne’e akompaña husi Adidu Edukasaun RDTL iha Portugal Sr. Rojer Rafael Soares ho nia ekipa.(Media FDCH)