Díli, 25/07/2018 (FDCH), Liafuan ne’e Kay Rala Xanana Gusmão hato’o bainhira sai oradór ba semináriu edukasaun ne’ebé organiza husi Embaixada Indonesia iha Timor-Leste. Lider Istóriku ne’e hatutan tan katak ho mundu ne’ebé agora aat ona, husu ba universidade sira atu prodúz ema ho kualifikasaun ne’ebé bele dezenvolve estadu ida-ne’e ho diak no dignu.
“Ho mundu agora ne’ebé aat los, universidade sira tenki hanoin ona oinsa hanorin ema atu sai good citizen (sidadaun diak) ne’ebé foun, la’os hanorin ema atu sai matenek de’it”. Dehan Eis Premeiru Ministru V Governo Constituisional ne’e perante partisipantes ne’ebé mai hosi estudantes universitarius iha rai laran inklui dosentes hosi universides balun Indonesia nian.
Good Citizen tuir Xanana katak ema ne’ebé mai ho karaterístiku foun bainhira nia fila-fali ba sosiedade nia leet depoisde remata tiha nia estudu.
“Imi ne’ebé remata ona estudu, sei fila ba imi nia sosiedade no hetan servisu iha fatin ruma, tanba ne’e tenki mai ho hanoin no mentalidade ne’ebé que foun mós”. Tatoli aman nasaun ne’e ba estudante no dosente sira ne’ebé partisipa iha semináriu refere.
Kay Rala Xanana Gusmão mós husu ba universidade sira atu hasa’e kualidade ensinu nian no labele hanoin kompete malu hodi dehan tinan ida ne’e fó sertifikadu barak liu hodi hadau de’it kuantidade maibe presiza haforsa liutan iha kualidade ensinu nian.
Alende setór edukasaun, eis Prezidente RDTL ne’e mós ko’alia kona-ba oinsa valoriza kultura Timór sai identidade nasaun nian.
“Ha’u ajuda ona grupu dansa barak, maibé sira seidauk hatudu momoos ita nia kultura original”. Konabá ida-ne’e, Kay Rala Xanana Gusmão hatete nia triste bainhira hare ema indonézia mai aprezenta sira nia dansa kultural (tarian bali ho Jember carnaval) iha Timor-Leste.
“Ohin ha’u haree sira dansa, hau triste tanba sira hatudu sira nia identidade kultural mai ita (timoroan), maibé ita rasik laiha buat ida atu hatudu ba sira”. Dehan oradores ne’e durante loke ninia diskuru.
Maibé lider nasaun ne’e fiar no garantia katak tinan 5 nia-laran ne’e governu sei fó atensaun makas ba setór kultura.
“Haree ba ida-ne’e hotu, governu (VIII Governu Constitusional) iha tinan lima nia-laran ne’e sei fó atensaun makaas ba setór kulura, para ba oin ita mós hatudu ita nia kultura ho “kebanggaan”. Dehan eis Ministru Planeamentu no Investimentu Estratéjiku iha VI Governo Constitusional ne’e.
Alende Kay Rala Xanana Gusmão, oradór seluk ba semináriu ne’e maka Prof. Dr. Ario Damar, Dekanu Fakuldade Marítima, Institut Pertanian Bogor (IPB) no akompaña husi Embaxador Indonesia mai Timor-Leste Sahat Sitorus inklui Adidu Edukasaun Indonesia nian Sedercor Melatunan.
Entretantu semináriu ho tema Edukasaun ne’e modera husi Isménio Martins da Silva atuál Sekretáriu Ezekutivu Fundo de Desenvolviemnto do Capital Humano (FDCH). Enkuantu Partisipantes mai husi civitas akadémiku ne’ebé eziste iha Timor-Leste inklui ninia estudante sira. (Media FDCH)