Díli, 30/09/2020, Diretora Ezekutiva Fundo de Desenvolvimento do Capital Humano (FDCH) Sra. Leila Carceres dos Santos akompaña husi Koordenadór GAPPEFIV Sr. Hermenegildo da Silva partisipa iha enkontru entre Japan International Corporation Agency (JICA) ho bolseiru mestradu timoroan na’in 14 ne’ebé selesionadu atu ba hala’o estudu iha universidade sira iha Japaun iha area oin-oin.
Enkontru ne’e rasik realiza iha salaun Orchid, Timor-Plaza ne’ebé partisipa mós husi benefisiariu sira ba programa bolsa estudu JICA nian ne’ebé termina ona estudu hodi fahe esperiénsia durante hala’o estudu iha Japaun ba bolseiru selesionadu sira ne’ebé sei ba hala’o sira ninia estudu iha tinan ne’e.
Iha intervensaun Diretora Ezekutiva FDCH Sra. Leila Carceres dos Santos apresia ho apoiu Governu Japaun nian liu husi ninia ajénsia JICA hodi kontribui ba dezenvolve rekursus umanus Timor-Leste nian no agradese mós ba JICA ne’ebé fó oportunidade ba FDCH hodi hola parte iha momentu importante ne’e.
Husu mós ba bolseiru selesionadu hirak ne’e atu aproveita oportunidade ne’e hodi hala’o sira ninia estudu ho di’ak nune’e fila mai bele kontribui ba dezenvolvimentu nasaun nian.
JICA tinan-tinan sempre fornese bolsa estudu ba Timoroan sira atu ba hala’o estudu iha Japaun iha area oin-oin. (Média_FDCH)