Díli, 09/07/2019. Sekretaria Ezekutiva Fundo de Desenvolvimento do Capital Humano (FDCH) interina Sra. Leila Carceres dos Santos ho Prezidente Konsellu Administrasaun Aeroportu no Navegasaun Aérea Timor-Leste (ANATL, EP) Sr. Romualdo da Silva akompaña hosi diretór sira ofisialmente halo anúnsiu ba públiku kona-ba vaga bolsa estudu ba timoroan na’in neen (6) ne’ebé sei ba hala’o estudu iha Poltekbang (Politeknik Penerbangan)  Suarabaya- Indonesia.

Anúnsiu ofisiál ne’e halo liuhosi konferénsia Imprensa ne’ebé halo ho Media nasionál sira iha Sala VIP Aeroportu Internasionál Prezidente Nicolau Lobato.

Prezidente Konsellu Administrasaun ANATL Sr. Romualdo da Silva hatete programa bolsa estudu ne’e ANATL realiza tanba hetan atribuisaun pakote orsamentu hosi FDCH ho montante $50 mill ba programa bolsa estudu nian iha tinan 2019.

Tanba ne’e vaga bolsa estudu ho nivel Diploma Três (D3) ne’ebé atribui ba timoroan sira atu konkore ne’e, iha área tolu hanesan:

  1. Air Traffic Control (ATC) vaga ba ema na’in 2
  2. Airport Electricity vaga ba ema na’in 2
  3. Airport Engineering ba ema na’in 2

Hahú iha segunda loron 15 fulan ne’e sei simu aplikante sira ne’ebé iha interese ba Vaga Bolsa estudu ne’e.

Entretantu selesaun ba kandidatu sira sei hala’o ba faze tolu hanesan (1. Simu no selesaun dokumentus ne’ebé sei hala’o hosi ekipa traballu ne’ebé kompostu hosi ANATL, FDCH-MESCC, (2. Ezame eskrita sei hala’o hosi ekipa ANATL, FDCH-MESCC no Poltekbang ho tipu matéria Test Potensi Akademi (TPA) no faze ikus liu mak (3.  Entrevista ne’ebé sei halo direita hosi Poltekbang no sei observa hosi ANATL, FDCH-MESCC hodi garantia transparénsia.

Informasaun kompletu no kritéria sira oinsá atu konkore ba vaga bolsa estudu ne’e bele haree direita iha kuadru avizu Aeroportu Internasionál Prezidente Nicolau Lobato (Torre Controlo nia okos) no akompaña mós iha Media nasionál sira. (Media FDCH)

Related Post :


Total Viewer : 19907 Views || Category: Notisia