DILI, 12/07/2017 (FDCH) Ekipa monitorizasaun hosi Secretariado Técnico Fundo de Desenvolvimento do Capital Humano (FDCH) halo monitorizasaun ba treinamentu iha área Jestaun Rekursus Umanus Profisionál ba funsionáriu Ministériu Justisa (MJ) hamutuk na’in 20 ne’ebé kompostu hosi feto nain 8 no mane nain 12 iha Rejiaun Administrativu Espesiál Oe-Cusse Ambeno.
Monitorizasaun ne’e nu’udar parte ida atu hatene impaktu hosi implementasaun orsamentu ba formasaun profisionál iha area oin-oin, nune’e FDCH kontinua halo monitorizasaun ba iha sentru formasaun sira ne’ebé finansia hosi FDCH.
Sekretariadu Tékniku FDCH hetan responsável hodi halo monitorizasaun bazeia ba diploma ministerial no. 9/2011 ne’ebé afirma iha artigu 7 kona-ba halo koordenasaun, assessment, monitorizasaun no avaliasaun ba projetu ka programa hotu ne’ebé finansia hosi FDCH, hafoin rezultadu hirak ne’e sei relata ba iha Conselho de Administração do FDCH.
“Objetivu prinsipal hosi programa monitorizasaun ne’e mak uainhira númeru instituisaun no númeru benefisiariu sira ne’ebé aumenta presiza atu hametin liutan FDCH nia mandatu,liu-liu atu hodi monitoriza no avalia ba programa sira hotu ne’ebé finansia tiha ona hosi Fundo de Desenvolvimento do Capital Humano nian. Objetivu ikus liu hosi programa ne’e, atu hadi’a jestaun kona ba programa sira ne’ebé maka ikus mai bele fó impaktu ne’ebé di’ak liu ho hahalok ne’ebé mak nia kualidade aas liu ba iha nia profesialusmu,” haktuir Xefe ekipa monitorizasaun Atanasio Soares.
Atanasio hateten monitorizasaun ne’e refleta ba decretu lei no. 12/2011, iha artigo 2 (objetivu husi fundu), pontu a), asegura finansiamentu husi investimentu públiku ba formasaun no dezenvolvimentu rekursus umanus nasionál no mós iha pontu b), ko’alia kona-ba promove transparénsia no responsabilidade liu husi hadi’a Sistema relatóriu no prestasaun kontas kona-ba ezekusaun programa no projetu ba formasaun no dezenvolvimentu kapital umanu, iha mós lei kona-ba orsamentu jerál estadu (OJE) husi Dekretu Governu nian no. 1/2014,iha artigu 13 no 14 ne’ebé fó biban ba FDCH atu hodi tau matan ba iha akontabilidade no garante kualidade ba despeza husi orsamentu jerál estadu (OJE) tinan 2014 nian.
Objetivu estratégiku husi programa monitorizasaun mak atu hatene kona-ba projetu ezistensia sira, atu verifika no halo monitorizasaun ba implementasaun programa ne’ebé mak tuir planu, propoin no husu ba finansiamentu, atu sukat kona-ba kualidade no kuantidade benefisiáriu sira nian husi programa ne’ebé mak relasionadu ho proposta ba finansiamentu nian, atu monitoriza lalaok servisu husi instituisaun sira,ne’ebé mak sai hanesan servidor ba servisu nian ka sira nian atendementu bele koresponde ona ba ita nia nesesidade ou ita nia pedidu.
Tuir informasaun ne’ebé hetan husi formandos sira katak treinamentu ne’ebé agora dadaun sira tuir ne’e diak,tanba bele aumenta sira nia kapasidade maibé sira enfrenta mós difikuldade durante iha treinamentu nia laran.
“Formasaun ida ne’e ba ha’u sente di’ak no ha’u husu mós atu aumenta tan formasaun ba ami sira ne’ebé foin mak tuir no ha’u senti di’ak ba ha’u atu aumenta ha’u nia kapasidade, iha formasaun ida ne’e nia problema ba ha’u mak lingua,” haktuir Manuela do Rosário Araújo.
Iha oportunidade hanesan formandu seluk mós komenta katak formasaun ida ne’e kapas ona, maibé ba futuru persiza halo tradusaun ba materia sira ba lian tetun, tanba materia sira ne’ebé sira hetan mesak ho lian portugues no difikulta sira, maske iha esplikasaun formador uza mós tradutor ida hodi tradus saida mak formador ne’e esplika.
“Iha formasaun ne’e di’ak no kapaas so que iha parte balu ladun komprende lingua portugues,ha’u husu ba ministeriu relevante,halo tan formasaun ida ne’e hodi kapasita ami no aprende di’ak liu tan,metode aprezentasaun di’ak no kapaas,se bele kuandu ba oin favor ho lian Tetun ho metode apresentasaun,”haktuir Jose Sequeira.
Formasaun ida ne’e hahú iha loron 06/07/2017 no termina iha loron 17/07/2017, Durante formasaun maioria partisipante sira antusiasmu hodi partisipa formasaun ne’e to’o remata.(Media FDCH)