Díli, 17 Agostu 2021. Fundo de Desenvolvimento do Capital Humano (FDCH- MESCC) Asina ona kontratu ho bolseiru ba programa Bolsa Hakbi’it ne’ebé selesionadu hodi kontinua sira ninia estudu iha universidade publiku Universidade Nacional Timor Lorosa’e (UNTL), eventu ne’e realiza Salaun Auditóriu Liceu UNTL, Colmera.
Kontratu ne’e asina direita husi Diretór Ezekutivu FDCH Sr. Hermenegildo da Silva ho bolseiru sira benefisiariu programa Bolsa Hakbi’it no hetan vistu direita husi Magnifiku Reitór UNTL Dr. João Soares Martins.
Bolseiru hamutuk 480 ne’e sei hala’o sira ninia estudu iha UNTL ho nivel estudu hahú husi Diploma III (D3) to’o Lisensiatura (S1) iha fakuldade sira hanesan Agrikultura, Enjeñaria, Edukasaun, Direitu, Ekonomia, Siénsia Sosiál no Filosofia.
Diretór Ezekutivu FDCH Sr. Hermenegildo da Silva iha ninia diskursu ba serimónia ne’e, husu ba bolseiru sira atu foku ba estudu nune’e, bele termina sira ninia esdutu ho di’ak tuir kontratu ne’ebé estabelese husi FDCH ho bolseiru sira no FDCH mós sei akompaña prosesu estudu bolseiru sira nian to’o termina.
“Ida ne’e oportunidade di’ak ba ita-boot sira tenke haka’as-an estuda atu hetan valor ne’ebé di’ak, ida ne’e importante tebes, karik ita boot sira la konsege amostra rezultadu ne’ebé di’ak ita boot sira sei moe ba ita boot sira nia familia, kolega no ba públiku tomak, ba estadu ne’ebé investe ona ba ita boot sira” hateten Diretór Ezekutivu FDCH
Reitor UNTL Dr. João Soares Martins, agradese ba VIII Governu liuhusi Ministériu Ensinu Superior Siénsia no Kultura (MESCC) ne’ebé ho inisiativa di’ak hodi fó bolsa estudu ba familia kbi’it la’ek sira hodi asesu ba hala’o estudu iha banku ensinu superior.
“Primeiru lugar hakarak agradese ba VIII Governu, Ministériu Ensinu Superior ba oportunidade nomós ba intensaun kria fundu hakbi’it ne’ebé fó ba estudante sira mai husi familia sira ne’ebé kbi’it ladun to’o, ida ne’e hakarak agradese tebe-tebes tanba ho inisiativa ne’e bele ajuda hakbi’it familia sira iha Timor laran tomak, la’os hotu-hotu maibé sira ne’ebé priense kriteria bele haruka sira nia oan mai eskola iha universidade, tanba estadu mak sei selu, la’os de’it iha UNTL maibé ba mós ensinu superior sira iha rai-laran,” hateten Magnifiku Reitór UNTL .
Reprezentante Bolseiru Leonito Marques da Silva hato’o agradesimentu ba MESCC ho FDCH ne’ebé atribui ona bolsa ba sira hodi hala’o sira ninia estudu iha banku ensinu superior.
Partisipa iha serimónia asina kontratu ho bolseiru sira ne’e, Vise Reitór no pro Reitor sira husi UNTL, Koordenadora UCAE-MESCC Sra. Amelia da Silva de Araújo, Reprezenta Diretóra Geral Ensino Suprior -MESCC, Koordenadór GAGESI-FDCH Sr. Henrique do Rosario, Koordenadora GAFRHI FDCH, Sra. Josefina do Nascimento no ekipa tekniku sira husi UNTL no ST-FDCH. (Média_FDCH)