Díli, 11/03/2020, Diretora Ezekutiva Fundo de Desenvolvimentu do Capital Humano (FDCH) Sra. Leila Carceres dos Santos simu iha ninia Gabinete Encaregado de Negocios Embaixada Brazil nian iha Dili Sr. Octavio M.G. Lopes hodi ko’alia kona-bá posibilidade kooperasaun Governu Brazil ho FDCH hodi haree ba programa bolsa estudu ne’ebé Governu Brazil fornese ba timoroan sira.
Iha enkontru Encaregado de Negocios Embaixada Brazil nian Sr. Octavio M.G. Lopes aprezenta programa prinsipál rua ne’ebé ohin loron sira iha hanesan Programa de Estudantes-Convênio de Graduação (PEC-G) ne’ebé gratuita bainhira Timoroan sira ba hala’o estudu iha nivel lisensiadu (S1) no Programa de Estudantes-Convênio de Pós-Graduação ( PEC-PG) ne’ebé nu’udar bolsa estudu husi Governu Brazil ho nivel Mestradu (S2) no Doutoramentu (S3).
Diretora Ezekutiva FDCH Sra. Leila Carceres dos Santos iha ninia intervensaun agradese tebes ba apoiu Governu Brazil nian no kontinua dezeju atu iha kooperasaun di’ak liután ho Embaixada hodi kontribui ba dezenvolvimentu rekursus umanus Timor-Leste nian.
Akompaña mós iha enkontru ne’e Asesora FDCH Sra. Ana Paula dos Santos, Tékniku Jurídiku sira, Koordenadór no Xefe departamentu balun no funsionáriu husi Embaixada Brazil nian.
Tuir dadus ne’ebé FDCH iha to’o ohin loron timoroan 267 mak hetan bolsa estudu husi governu no finansia liuhosi FDCH hodi hala’o sira ninia estudu iha Brazil iha área oin-oin husi numeru ne’e, 160 termina ona sira ninia estudu no 87 bolseirus sei ativu hela. (Média_FDCH)