Dili, 29 Janeiru 2024.Diretór Ezekutivu ba Fundo de Desenvolvimento do Capital Humano (FDCH), Júlio Aparício akompaña husi Diretór Nasionál no  Asesór sira realiza enkontru ho  Embaixadór Malázia ba Timor-Leste, Amarjit Sarjit Singh ho ekipa no delegasaun sira husi Universidade publiku no privadu Malázia nian, iha salaun Knowledge Center, Palacio do Governo.

Objetivu enkontru ne’e hodi halo diskusaun no buka posibilidade kooperasaun ho Embaixada Malázia no universidade sira Malázia nian ne’ebé dau-daun ne’e partisipa hela iha Feira Edukasaun  Malázia ne’ebé realiza iha Dili hodi fó oportunidade ba foinsa’e  timoroan sira ne’ebé interesadu  atu ba hala’o estudu iha universidade sira iha país Malázia.

Embaixadór Malázia ba Timor-Leste, Amarjit Sarjit Singh hatete Malázia ho Timor-Leste iha koopersaun ida di’ak tebes, ohin loron universidade sira iha Malázia  prontu atu servisu hamutuk hodi fó mós oportunidade ba timoroan sira atu eskoila mós Malázia núdar  fatin destinasaun ba timoroan sira hodi kontinua sira ninia estudu iha banku ensinu superior. Ho nune’e ohin nu’udar oportunidade di’ak ida hodi mai aprezenta  Reitór sira no ekipa   ne’ebé mai husi  universidade sanulu resin-sia (19)   hodi halo diskusaun no partilla informasaun sira kona-ba sira nia Universidade ida-idak.

Diretór Ezekutivu  FDCH, Júlio Aparício  agradese ba inisisativa Governu Malázia nian liuhusi ninia Embaixadór hodi fó oportunidade  ba timoroan no oinsá bele fasilita joven sira hodi ba hala’o  estudu iha Universidade sira ne’ebé eziste iha Malázia.

Durante enkontru ekipa husi FDCH ho delegasaun husi Malázia partilla informasaun ba malu no halo diskusaun téknika liga liu ba posibilidade kooperasaun iha futuru liu-liu iha dezenvolvimentu rekursus umanus Timor-Leste nian haktuir ba prioridade nasaun liga ho area estratéjiku ba dezenvolvimentu país nian. (Média-FDCH)

Related Post :


Total Viewer : 388 Views || Category: Notisia