Dili, Fundo de Desenvolvimento do Capital Humano (FDCH) iha loron 23 Marsu 2024 selebra aniversáriu ezisténsia ba da dala-13 (23 marsu 2011-23 marsu 2024) ho tema “Dezenvolvimentu Kapital Umanu Ne’ebé Forte Hodi Kontribui no Reforsa Prosesu Dezenvolvimentu Timor-Leste Hahun ba Objetivu PEDN 2011-2030” iha Hotel Novo Turismo.

Selebrasaun ezisténsia FDCH ba dala-13 ne’e hahú ho misa agradesimentu iha igreza Balide ne’ebé prezide husi Padre Angelo Salsina, iha homilia padre parabeniza ezisténsia FDCH nian no husu ba FDCH atu servisu ho di’ak liutan, mantein profisionalizmu, servisu ho honestidade no responsabilidade hodi atende publiku liga ho programa sira ne’ebé ohin loron iha.
Diretór Ezekutivu FDCH, Júlio Aparício hatete ho ezisténsia FDCH nia benefisia ona timoroan 108, 945 husi programa haat ne’ebé iha hanesan: (1. Formasaun Profisionál hahú husi 2011- 2023 ho benefisiáriu hamutuk 40,186, mane 72,034 no Feto 36,911, (2. Formasaun Téknika hahú husi 2011-2023 ho benefisiáriu hamutuk 39,552, mane 26,564 no Feto 12,988, (3.Bolsa Estudo hahú husi 2011-2023 ho benefisiáriu hamutuk 10,975, bolseiru ativu 5,592, gradua ona 5,113, hetan kanselamentu 263, mate durante estudu 7 no (4. Tipu Formasaun seluk ne’ebé ohin loron hanaran fali Boa Governasaun no jestaun institusionál ho benefisiáriu hamutuk 18,232, mane 10,664 no feto 7,568.
Selebrasaun aniversáriu ne’e partisipa husi Ministru Planeamentu Investimentu Estratéjiku, nu’udar Prezidente CA-FDCH, Eng. Gastão Francisco de Sousa, Ministru Ensinu Superior, Siénsia no Kultura Sr. José Honório da Costa Pereira Jerónimo (membru Permanente ba CA-FDCH), Ministru Justisa, Sr. Sérgio de Jesus Fernandes da Costa Hornai (membru CA-FDCH), Ministru Petróleu no Rekursus Minerais Sr. Francisco da Costa Monteiro (membru CA-FDCH) no Sekretariu Estadu Formasaun Profisionál no Empregu, Sr. Rógerio Araújo Mendonça (membru CA-FDCH).
Ministru Planeamentu no Investimentu Estratéjiku no Prezidente Konsellu Administrasaun FDCH, Eng. Gastão Francisco de Sousa parabéniza ezisténsia FDCH nian no agradese ba parte hotu ne’ebé durante ne’e servisu hamutuk ho FDCH hodi kontribui ba dezenvolvimentu rekursus umanus hodi apoiu ba dezenvolvimentu país nian iha setór hotu-hotu.
FDCH hari’i liu husi Lei nu. 1/II, 14 Fevereiru 2011, ne’ebé aprova Orsamentu Jerál Estadu ba 2011, no hanesan Fundu Autonomu, bazeia ba artigu 2. numeru 4 Lei nu. 1/2022, 3 de Janeiru Orsamentu Jeral Estadu 2022. Kona-ba Orsamentu no Jestaun Finanseira.

Kriasaun ba Fundu ida ne’e haree liu ba nesesidade kapasitasaun no dezenvolve rekursus umanus nasionais bazeia ba nesesidade Timor-Leste nian, ne’ebé permiti investimentu ida ne’ebé sériu no adaptadu, ho posibilidade hodi planeia, jere no ezekuta programas plurianuais, nesesidade ida ba dezenvolvimentu programas formasaun ba durasaun ne’ebé naruk no kontinuidade ba programa sira iha tinan ne’ebé naruk. (Média-FDCH)

Related Post :


Total Viewer : 247 Views || Category: Notisia