Díli, 01/08/2019. Sekretáriu Ezekutivu Fundo de Desenvolvimento do Capital Humano (FDCH) Sr. Isménio Martins da Silva simu delegasaun husi Administrasaun Navesgasaun Aérea Timor-Leste (ANATL) no Politeknik Penerbangan (POLTEKBANG) iha edifísu FDCH Palaçio do Governo.
Prezensa delegasaun sira ne’e atu informa relatóriu prosesu selesaun ba kandidaturas bolseirus ne’ebé hala’o ona husi ekipa tékniku inklui médiku sira husi Poltekbang rasik iha Pusat Budaya Indonesia (PBI) no Hospital Nacional Guido Valadares (HNGV) Dili foin lalais ne’e ba FDCH nudár institiusaun ne’ebé finansia programa bolsu-estudu ida-ne’e.
Iha relatóriu refere, ekipa Poltekbang ne’ebé lidera husi Dr. Wiwied Suryono esplika detallu prosesu selesaun sira no to’o ninia rezultadu. Hataan ba ida-ne’e Sekretáriu Ezekutivu FDCH Sr. Isménio Martins da Silva hato’o ninia apresiasaun ba ekipa sira nia servisu no salienta prosesu sira kobre ba responsabilidade ANATL ho Poltekbang, FDCH nia papél atu garantia prosesu tomak la’o ho transparénsia no profisionál.
Molok ne’e iha loron 29-30 Jullu 2019 ekipa Poltekbang husi Indonesia mai halo teste ba kandidatura bolseirus sira iha Dili.
Rezultadu ofisiál ba konkursu programa bolsa ne’e parte ANATL, FDCH ho POLTEKBANG sei fó sai ba públiku liu hosi konferénsia imprensa ne’ebé sei hala’o iha loron 1/08/2019, iha parte loro-kraik.
Marka mós prezensa ba sorumutu ne’e mak Interinu Prezidente ANATL Sr. Verissimo Nai Sia, Membru C.A. ANATL Sr. Luis C. Alves, Sra. dr. Niken Mira (Poltekbang), Sr. Muti Sazali (Poltekbang), Diretór ATS/STAN ANATL Sr. José Luis da Costa inklui Koordenador sira husi FDCH Sr. Henrique do Rosário, Adérito Soares, Eusébio Barreto no Filomeno dos Santos Lay. (Média FDCH)