Díli, 28 Jullu 2022. Ministériu Ensinu Superior, Siénsia no Kultura (MESCC- Sigla iha Portugés) liuhosi Fundo de Desenvolvimento do Capital Humano (FDCH- Sigla iha Portugés), realiza Semináriu Nasionál hodi Selebra loron Ensinu Superior no Loron Mundiál ba Siénsia ba dala-XXI ho tema “ Kapasitasaun no Desenvolvimentu Rekursus Humanus Nasionais ,” iha salaun Delta Nova.
Objetivu husi semináriu ne’e hodi selebra no komemora loron Ensinu Superior no Loron Mundiál ba Siénsia ba dala-XXI ho aprezenta rezultadu estudu avliasaun ba programa FDCH nian hahú hosi tinan 2015 to’o 2020 ba públiku kona-bá progresu, impaktu ne’ebé FDCH atinje no dezafiu sira ne’ebé FDCH enfrenta liu-liu iha dezenvolvimentu rekursu umanu Timor-Leste nian iha setór oi-oin.
Semináriu Nasional ne’e hetan abertura hosi Exelensia Ministru Ensinu Superior Siensia no Kultura no Prezidente Konsellu Administrasaun FDCH, Sr. Longuinhos dos Santos ne’ebé akompaña hosi Diretór Ezekutivu FDCH, Dr. Cristovão dos Reis, Diretora Ensinu Superior MESCC, Sra. Maria Filomena Lay Guterres no orador sira.
Orador sira ba semináriu nasionál ne’e Koordenador Ezekusaun Planu Programa, Projeto no Sistema Informasaun Sr. Henrique do Rosario ne’ebé aprezenta kona-bá sistema Beneficiary Management System Information ne’ebé FDCH estabelese. Dr. Afonso de Almeida ho Dr. Carlos da Conceição nu’udar peskizadór, aprezenta Rezultadu Estudu Avaliasaun programa FDCH 2015-2020, Dr.Edmundo Viegas aprezenta topiku kona-bá Perspetiva Dezenvolvimentu Rekursus Umanus Timor-Leste nian no Dr. Augosto Soares núdar moderador.
Iha semináriu ne’e entrega mós sertifikadu apresiasaun ba peskizador hamutuk na’in 40 ho pozisaun Asistente Téknika ne’ebé ajuda peskizadór senior na’in rua hodi halibur dadus no informasaun sira relasiona ho estudu no avaliasaun ba servisu FDCH nian etapa II 2015-2020 nian.
Patisipa iha semináriu ne’e, Reitor sira hosi universidade, Prezidente institutu, diretor jerál, diretor nasionál Rekursus Umanus, pontu fokal sira hosi Liña Ministeriál no instituisaun estadu sira ne’ebé akreditadu iha FDCH, Dirijente sira MESCC, Koordenadores no Xefe Departamentu sira no ekipa tekniku husi ST-FDCH.