Dili.05/02/2016(FDCH). Sekretariádu Tékniku FDCH realiza sorumutu dahuluk iha tinan 2016 ho Liña Ministerial akreditadu iha FDCH. Objetivu husi Soru-mutu ne’e atu garante kualidade ezekusaun no sistema reportajen ida ne’ebe di’ak no transparente durante implementasaun programas FDCH nian.
Sekretáriu Ezekutivu FDCH Sr. Ismenio Martins da Silva iha nia-diskursu kongratula Liña Ministerial tanba durante tinan 2015 halo ona esforsu makas hodi garante kualidade ezekusaun ba programa tomak maske nune’e ezekusaun deit sei la to’o, presiza mós rezultadu ezekusaun di’ak ba Ministériu no Instituisaun estadu ne’ebé akreditadu iha FDCH.
“Pontu Fokal sira iha papel importante atu transmite informasaun hotu ba diretór no superior sira iha kada Liña ministerial maibe kuandu la konsege transmite informasaun ho di’ak bele afeta ba planu ministériu nian atu hasa’e kapasidade pessoal iha ministeriu ne’e rasik”. tenik Sekretariu Ezekutivu FDCH Sr. Ismenio Martins da Silva.
Enkuantu FDCH rasik iha fleksibilidade barak hodi fasilita LMs durante ezekuta programa formasaun nian maibe prosesu pagamentu tenke bazeia nafatin ba Dekretu enkuantu iha tinan 2016 Ministeriu Finansa halo mudansa ba sistema pagamentu Direta, pagamentu adiantamentu no aprozionamentu. Ho nune’e Sekretariadu TéknikuFDCH rasik sei hadia fali regras balun.
“Iha tinan ida ne’e Sekretariadu Tékniku FDCH sei iha regra foun ba pedidu husi LMs. Pedidu hirak ne’e balun bele aprova no balun sei la hetan aprovasaun. Pedidu formasaun nian ne’ebé la hetan aprovasaun karta sei diretamente mai husi Sr. Xanana ba ita bo’ot sira nia membru Governu ho Superior”. Haktuir Sekretáriu Ezekutivu FDCH Sr. Ismé-nio Martins da Silva.
Entretantu parte sira hanesan Liña Ministerial, Instituisaun outonomia Estadu no Sekreariadu Tékniku FDCH tenke sai nafatin hanesan parseiru ida di’ak hodi servi klientes ka benefisiariu timor-oan sira, Soru-mutu ne’e interaktivu tebes tanba iha perguntas no resposta kona-ba prosesu pagamentu tinan 2015 no mudansa sistema pagamentu iha finansa iha tinan 2016.
Aleinde ne’e Chefe Unidade sira husi FDCH nian halo mós aprezentasaun ba kona-ba prosesu no prosidementu Bolsa de Estudu, prosedimentu ba Formasaun, verifikasaun inklui prosedimentu foun iha sistema aprovisionamentu ne’ebé ligadu ho kompra billete aviaun, fornesimentu aihan no material eskritoriu durante formasaun iha rai laran.
Iha tinan 2016 Sekretariadu Tékniku FDCH ho Liña Ministerial esforsu nafatin atu ezekuta programa ho disiplina no bazeia nafatin ba LIVRO 6 kona-ba Fundu Espesiais.
Entretantu benefisiariu timoroan hotu-hotu ba programa FDCH mak kliente ida ne’ebé parseiru sira tenke atende ho di’ak atu alkansa objetivu prinsipál ba desenvolvimentu kapital umanu hodi servi di’ak liu tan nasaun iha futuru.
Total orsamentu ne’ebé atribuídu ba tinan 2016 hamutuk 34 milloens, relativamente ki’ik kompara ho tinan kotuk, 2015. Ne’e signifika katak orsamentu previstu ba 2016 redús ona ba 17%, mézmuke admite katak iha númeru instituisaun kuaze hanesan ho tinan 2015.(Media FDCH)