Dili, 28 Jullu. Diretór Ezekutivu Fundo de Desenvolvimento do Capital Humano (FDCH), Dr. Cristóvão dos Reis akompaña husi Diretór Nasionál Planu, Pekiza, Monotorizasaun no Fiskalizasaun –FDCH, Sr. Moises Soares, Asesora Téknika ST-FDCH Sra. Ana Paula dos Santos no tékniku sira partisipa iha Reuniaun Mini Komité Revizaun Orsamentu (KRO) iha Auditorium Ministériu Finansas, Aitarak laran.

Reuniaun mini KRO ne’e prezide direita husi Sua Exelensia Primeiru-Ministru Sr. Kay Rala Xanana Gusmão ne’ebé akompaña husi Sua Exelensia Vise-Primeiru-Ministru, Ministru Koordenadór Asuntus Sosiais no Ministru Dezenvolvimentu Rurál no Abitasaun Komunitária, Sr. Mariano Assanami Sabino, Sua Exelensia Ministra Finansas Sra. Santina Viegas Cardoso, Sua Exelensia Ministru Planeamentu Investimentu Estratejiku (MPIE) Sr. Gastão Francisco de Sousa, Sua Exelensia Ministru Obras Publika Sr. Samuel Marcal, Sua Exelensia Vise-Ministru Finansas Sr. Helder Lopes.

Iha oportunidade ne’e Diretór Ezekutivu FDCH, Dr. Cristóvão dos Reis halo aprezentasaun progresu servisu no ezekusaun orsamentu FDCH nian bazeia ba programa haat ne’ebé ejiste durante ne’e, hanesan programa Formasaun Profisionál, Formasaun Téknika, Bolsa Estudu no Programa Boa Governasaun no Jestaun Institusional.

Hafoin aprezentasaun Sua Exelensia Primeiru Ministru ho membru governu sira ne’ebé hola parte iha reuniaun mini KRO ne’e husu nafatin atu hadi’a di’ak liutan servisu hodi atinje ezekusaun orsamentu bazeia ba programa no planu sira ne’ebé trasa ona hodi lori moris di’ak ba povu no husu mós ba FDCH atu aprezenta rezultadu husi programa sira ne’ebé implementa ona hahú husi 2011 to’o ohin loron ba IX Governu. (Média-FDCH)