Dili, 16/12/2019. Diretora Ezekutiva Fundo de Desenvolvimento do Capital Humano (FDCH), Sra. Leila ML. Cárceres dos Santos, reprezentante husi Ministerio Ensino Superior, Ciência e Cultura (MESCC), Direitor Jéral Administração e Finanças Ministerio Ensino Superior, Ciência e Cultura (MESCC), Sr. Hernâni Viterbo da Costa Soares ne’ebé akompaña mós husi Diretora Programa Nasionál Dezenvolvimentu Suku (PNDS) Sra. Dulce Junior Guterres, Diretor Jerál Estatístika Sr. Elias Dos Santos, Viçe Presidenti Instituto Nacional de Ciências e Tecnologia (INCT) Sr. Afonso de Almeida, ofisialmente halo lansamentu ba iha Livru Rezultadu Levantamentu dadus Rekursus Umanus Ezistentes iha Timor-Leste. Serimónia lansamentu Livru Rezultadu Levantamentu dadus Rekursus Umanus Ezistentes iha Timor-Leste ne’e rasik realiza iha salaun enkontru MSSI.
Diretora Ezekutiva Fundo de Desenvolvimento do Capital Humano (FDCH), iha nia intervensaun hatete katak dadus, informasaun no mós análize sira iha livru laran ne’e bele util no bele mós ajuda governu.
“ami hein katak dadus no informasaun no análize sira iha livru laran ne’e bele util ba ita hotu no mós sei ajuda governu, setór privadu no parseiru dezenvolvimentu internasionál sira hodi bele halo planu ida di’ak liu tan no implementasaun ida ne’ebé sei di’ak liu ba Timor-Leste, hodi bele atinje objetivu husi PEDN 2011-2030”. Katak Diretóra Ezekutiva FDCH Sra. Leila ML. Carceres dos Santos iha nia diskursu.
Entertantu Direitor Jéral Administração e Finanças Ministerio Ensino Superior, Ciência e Cultura (MESCC), Sr. Hernâni Viterbo da Costa Soares iha nia diskursu hatete katak lansamentu livru ne’e núdar mós pasu importante atu instituisaun hotu-hotu estadu nian iha koñesementu ba pontu situasaun rekursus umanus ezistentes iha Timor-Leste.
“ lansamentu ohin loron nian, hanesan pasu importante atu instituisaun hotu-hotu estadu nian iha koñesementu ba pontu situasaun rekursus umanus ezistentes iha Timor-Leste no áreas prioritárias ba formasaun ne’ebé ita presiza atu investe ho forma hodi kumpri metas no planu estratéjiku dezenvolvimentu nasionál”. Hatete Direitor Hernâni Viterbo da Costa Soares iha nia diskursu.
Iha oportunidade hanesan Direitor Jéral Administração e Finanças Ministerio Ensino Superior, Ciência e Cultura (MESCC), Sr. Hernâni Viterbo da Costa Soares hato’o mós agradesementu ba komvite hodi partisipa iha serimonia lansamentu Livru levantamentu dadus rekursus umanus ezistente iha teritoriu Timor-Leste laran tomak ida ne’e no hato’o mós ninia parabéns ba lideransa sira iha FDCH no mós ema sira hotu ne’ebé mak organiza no halo ona estudu ida ne’e.
Hanesan haktuir orientasaun husi Conselho de Administração do Fundo de Desenvolvimento do Capital Humano (CA-FDCH) iha mandatu VI Governu Konstituisionál no mós Eis Ministru Planeamentu Investimentu no Estratejíku (MPIE-sigla portugés) S.E Sr. Kay Rala Xanana Gusmão ne’ebé mak núdar Presidente do Conselho do Administração do Fundo hamutuk ho Membru Conselho de Administração nebe’é fó fiar ba ekipa ST FDCH hodi hala’o programa Levantamentu ida ne’e, ho nune’e mak FDCH simu orientasaun iha fulan maio tinan 2016 hodi halo estudo klean ida atu identifika númerus rekursus Umanus ezistentes iha Timor-Leste tomak, hodi ajuda governo bele halo polítika dezenvolvimentu rekursu umanus ida bazeia ba evidênsia. Ho nune’e maka Iha fulan setembru to’o dezembru 2017, ST-FDCH ko’ordena ho Diresaun Jerál Estatístika Ministériu Finansas, Ministériu Administrasaun Estatal (MAE) no ekipa Programa Nacional Desenvolvimento Suco (PNDS) hodi hahu forma ekipa enumeradores kada Aldeia ho numeru ekipa PNDS; 13, enumeradores: 2,504, Fasilitador Sosial Portu Administrativo – FSPA 95, Pessoal Apoio Administrasaun sucu –PAAS 339 no Ekipa 13: 28 ho total ekipa apoio : 2,979 pessoas.
Atividade ne’e kontinua to’o fulan Marsu 2018 hodi servisu hamutuk fali ho autoridade munisípiu no sosiedade tomak iha Munisípiu 12 no RAEOA- Oecusse atu hamutuk identifika área potensiál no prioridade hodi bele iha futuru FDCH bele finansia no responde ba prioridade hirak ne’e.
Bazeia ba dadus sensu populasaun tinan 2015 hosi Diresaun Jerál Estatístika ho total 662,285 ba tinan 17 ba leten no prosesu rekolla dadus ho totál populasaun 545, 557, ne’ebé reprezenta 82.4 % husi totál populasaun Timor-Leste nian.
Hafoin iha mandatu VIII governu Konstitusionál Livru ida ne’e hetan aprovasaun husi Ministru Ensino Superior Ciência e Cultura (MESCC) S.E. Dr Longinhos dos Santos MM, nebe’e solisita hodi halo lansamentu ba livru rezulta Rezultadu Levantamentu dadus Rekursus Umanus Ezistentes.
Livru Rezultadu Levantamentu dadus Rekursus Umanus Ezistentes ida ne’e rasik koordena no mós elabora husi Sr. Afonso Almeida, no Sr. Isménio Martins da Silva ne’ebé núdar Sekretariu Ezekutivu FDCH sesante mak sai núdar autor prinsipál ba programa LDRHE ida ne’e.
Livru levantamentu dadus rekursus umanu ezistentes ida ne’e hamutuk 13 ne’ebé reprezenta kada munisipiu no mós RAEOA-Oecusse inklui nasionál ida no fahe mós ba versaun inglés, Portugés no tetun.
Partisipa iha serimónia lansamentu Livru Rezultadu Levantamentu dadus Rekursus Umanus Ezistentes iha Timor-Leste ne’e mak komvidadus sira no mós funsionariu sira husi Sekretariadu Tekniku Fundo de Desenvolvimento do Capital Humano (FDCH). (Media FDCH)