Dili, 18, Setembru 2023. Konsellu Administrasaun ba Fundo de Desenvolvimento do Capital Humano (CA-FDCH sigla iha Portugés) realiza enkontru ba dala 24 no daruak iha mandatu IX Governu Konstitusionál nian hodi halo diskusaun kona-ba programa dezenvolvimetnu rekursu umanu Timor-Leste nian, iha sala enkontru MPIE, Fatuhada.
Enkontru CA-FDCH ne’e prezide direita husi Ministru Planeamentu no Investimentu Estratéjiku (MPIE) nu’udar Prezidente Konsellu Administrasaun ba FDCH Sr. Eng. Gastão de Sousa, iha ne’ebé partisipa mós husi Ministra Finansa Sra. Santina José Rodrigues F. Viegas Cardoso Membru Permanente ba CA-FDCH ne’ebé akompana mós husi Vise Ministra Finansa Sra. Felicia Claudinanda da Cruz Carvalho no Ministru Petróleu no Rekursus Minerais Sr. Francisco da Costa Monteiro membru permanente ba CA-FDCH.
Diretór Ezekutivu FDCH, Dr. Cristóvão dos Reis hatete, enkontru CA-FDCH ohin ko’alia liu kona-ba programa bolsa estudu, nune’e Sekretariadu Tékniku FDCH atualiza informasaun kona-ba bolsa estudu hahú husi 2011 mai to’o 2023 liu-liu kona-ba bolseiru sira ne’ebé sei ativu hela estudu no ba sira ne’ebé gradua ona. Alende ne’e halo mós diskusaun ba kriteria rekrutamentu ba programa bolsa estudu sira hanesan bolsa hakbiit no bolsa parsial husi CA-FDCH no aprova mós pedidu individuais no bolsa parsial husi rai-liur no rai laran.
Enkontru ne’e hahú ho aprezentasaun husi Diretór Ezekutivu FDCH, Dr. Cristóvão dos Reis kona-ba area estudu ba programa bolsa ne’ebé finansia liuhusi FDCH no definisaun ba area prioridade sira ne’ebé sei atribui bolsa iha 2024, Kriteria selesaun subsidiu ba apoiu bolsa parsial, aprezentasaun pedidu finansiamentu, aprezentasaun kona-ba bolsa estudu Merito no dosente universidade privadu no aprezentasaun kona-ba valor ba bolseiru sira iha nasaun sira ne’ebé daudaun ne’e hala’o sira ninia estudu ba hanesan Portugal, Brazil no Indonezia.
Hahú husi 2011-2023 programa bolsa estudu benefisia ona timoroan hamutuk 10,355 husi numéru ne’e sira ne’ebé gradua ona hamutuk 4,554, sira ne’ebé ativu hela sira ninia estudu hamutuk 5,533, sira ne’ebé hetan kanselamentu 261 no sira ne’ebé mate iha prosesu hala’o hela estudu hamutuk 7 .
Partisipa mós iha enkontru CA-FDCH ne’e asesor sira husi MPIE, Asesor Ministériu Justisa, Ministériu Ensinu Superior Siensia no Kultura, Diretór Nasionál SEFOPE, Xefe Gabinete MESCC, Diretór Nasionál, Asesor no Tékniku sira iha ST-FDCH. (Média-FDCH)