Dili, 09/03/2020 –Diretora Ezekutiva Fundo de Desenvolvimento do Capital Humano (FDCH) Sra. Leila Carceres dos Santos, akompaña husi Koordenadora Gabinete Administrasaun Finansa no Rekursus Umanus Internu (GAFRHI-FDCH) Sra. Josefina Goncalves partisipa iha serimónia aprezentasaun no entrega sertifikadu ba estajiáriu na’in 10 ne’ebé termina ona sira ninia estájiu durante fulan neen (6) iha Instituto Petroleo e Geolojia (IPG) .
Atividade aprezentasaun rezultadu estájiu ba estajiáriu sira durante fulan neen no mós entrega sertifikadu ba estajiáriu sira ne’e hala’o iha salaun enkontru IPG iha, Elemloi, Delta.
Iha intervensaun Diretora Ezekutiva FDCH Sra. Leila Carceres dos Santos apresia ho apoiu no kolaborasaun IPG nian hodi simu bolseirus graduadus hirak ne’e hodi hala’o estájiu to’o remata.
Programa Estájiu Profisional ne’e realiza atu hatuur mós timoroan sira atu servisu tuir sira ida- idak ninia area estudu hafoin gradua.
Entretantu Prezidente IPG Sr. Helio Casmiro Guterres husu ba estajiáriu hirak ne’e atu lori esperiénsia sira ne’ebé sira hetan durante estájiu hodi harikutan sira ninia koñesimentu no IPG sei la taka dalan ba estajiáriu hirak ne’e atu servisu iha IPG maibé sei haree ninia posibilidade.
Estajiáriu sira aprezenta servisu sira ne’ebé sira hala’o iha tempu estájiu hanesan involve iha ekipa hodi halo estudu ba rikeza minerais iha munisipiu balun no halo mós investigasaun no peskiza ba fenómenu naturais ne’ebé akontese.
Estajiáriu na’in 10 ne’e integra iha programa Estájiu Profisional ne’ebé FDCH lansa iha tinan kotuk, no estajiariu hirak ne’e hanesan benefisiariu ba programa bolsa estudu ne’ebé organiza husi Linas Ministerias no hetan finanseiru husi FDCH. (Média_FDCH)