Díli,13/06/20019,  Sekretáriu Ezekutivu Fundo de Desenvolvimento do Capital Humano (FDCH) Sr. Isménio Martins da Silva hala’o enkontru ida ho Ministra Solidariedade Sosiál no Inkluzaun (MSSI) S.E.  Sra. Armanda Berta dos Santos iha edifísiu MSSI, iha Caicoli Dili.

Pontus importantes ne’ebé ko’alia iha sorumutu ne’e mak Planu Programa Bolsa Estudu ne’ebé sei atribui ba grupu vulneravel sira (Inklui kbiit-laek sira nia oan) iha tinan 2020, haktuir  orientasaun Ministru MESCC S.E.  Sr. Longuinhos dos Santos MM nomós Polítika VIII Governu nian no koordenasaun ezekusaun programa MSSI  iha parte dezenvolvimentu Rekursus Umanus  iha área formasaun no bolsa estudu tinan 2019 .

Sekretáriu Ezekutivu FDCH Sr. Isménio Martins da Silva hatete objetivu hosi vizita ne’e iha asuntu rua ne’ebé atu fahe ka partilla ba S.E.  Sra. Armanda Berta dos Santos ho dirijente sira.

“Objetivu ami nia vizita iha buat rua, primeiru maka atu hamutuk hodi haree ba orsamentu Ministériu Solidariedade Sosiál no Inkluzaun ne’ebé iha Fundo de Desenvolvimento do Capital Humano, ba 2019  ita iha orsamentu porvolta de 100 mill, no Segundu ami mós mai atu aprezenta hela planu ida ne’ebé Señór Primeiru Ministru hato’o liuhosi Ministru Ensinu Superior Ciência e Cultura atu haree mós kona-ba programa bolsa estudu ba kbiit-laek nia oan,” hatete Sekretáriu Ezekutivu FDCH iha aprezentasaun.

Sekretáriu Ezekutivu FDCH  hatete iha tinan 2019 iha limitasaun orsamentu tanba ne’e FDCH aloka de’it $100 mill ba programa formasaun iha MSSI, maibé iha mós orsamentu ketak ne’ebé FDCH aloka ba iha Sentru Nasionál ba Rehabilitasaun ne’ebé nudár instituisaun autonomo ne’ebé ho  ninia orsamentu $100 mill hodi haree ba programa bolsa estudu.

“Hosi $100 mill ida ne’e ami haree katak talves mai servisu hamutuk di’ak liután liu-liu ho parte tékniku sira hodi ezekuta planu ne’ebé maka feitu tiha ona tanba ita tama ona ba fulan Juñu atu ba ona fulan Jullu maibé hosi ministériu seidauk ezekuta maske planu ne’e feitu no ami avalia hosi kedas 2018 mai,” hatete Sekretariu Ezekutivu FDCH.

Orsamentu ne’ebé aloka ba MSSI ne’e rasik sei  finansia programa sira hanesan  formasaun jenériku ba  funsionáriu kuadrus tékniku sira  iha area sira jestaun ba lideransa, atendimentu públiku, jestaun komunikasaun nomós area korrespondénsia no arkivu ne’ebé kabe ba formasaun profísionál ninian, formasaun ba área “kometimentu tezoreiru kontabilidade”  para bele ajuda nomós ba área administrasaun no aprovizionamentu. Parte seluk ba área ITC ninian iha mós iha área infrastrutura ba rede, ikus liu iha planu mós ba estudu ba mestradu ba  kuadrus tékniku sira.

Entretantu Ministra Solidariedade Sosial no Inkluzaun S.E.  Sra. Armanda Berta dos Santos hatete kooperasaun servisu MMSI ho FDCH la’ós foin mak akontese maibé antes ne’e iha ona hodi finansia programa formasaun no bolsa estudu ba funsionáriu sira.

“MMSI ho FDCH servisu hamutuk la’ós foin primeira vez maibé  dezde inísiu hodi ajuda ba ema ne’ebé kbiit laek sira, parte tékniku sira tuur hamutuk atu bele haree liu-liu ba programa ne’ebé mak iha ona hanesan Sekretariu Ezekutivu Fundo de Desenvolvimento do Capital Humano ohin hatete,”  Dehan  Ministra MSSI Sra. Armanda Berta dos Santos

Ministra MSSI Sra. Armanda Berta dos Santos  hatete durante ne’e FDCH ho MSSI iha kooperasaun servisu ida di’ak tebes hodi haree ba dezenvolvimentu rekursus umanus hanesan konsege halo aprovasaun ba programa bolsa estudu ba funsionáriu na’in 13 ne’ebé ohin loron hala’o hela  sira ninia estudu iha Solo Indonesia.

Kona-ba planu programa bolsa estudu ba kbiit-laek sira nia oan Ministra MSSI hatete presiza haree didi’ak atu nune’e apoiu ne’ebé atribui bele atribui duni ba ema ne’ebé merese atu hetan apoiu hosi governu.

“Ba oin presiza governu ajuda ba ema ne’ebé merese duni atu bele hetan, sekarik nia iha tiha ona mak ita ajuda tan entaun ema ne’ebé presiza ajuda ne’e nia la hetan fali, entaun ita presiza iha estratéjia ida ne’ebé di’ak para bele haree situasaun sira ne’e,” dehan Ministra

Ministra MSSI sujere atu implementa programa bolsa estudu ba grupu vulneravel no kbiit-laek sira nia oan ne’e ho fazeadamente.

Ministra MSSI Sra. Armanda Berta dos Santos mós orienta parte tékniku sira hosi MSSI atu servisu hamutuk di’ak liután ho FDCH nune’e bele ezekuta planu no programa sira ne’ebé iha ona.

Diretór Jerál MSSI Sr. Rui Exposto Gagu  informa iha tinan 2016 orsamentu ne’ebé FDCH aloka ba MSSI hamutuk $300 mill resin maibé ezekuta hotu no ezekuta to’o 90%, tama iha 2017 maske ho orsamentu duadésimo maibé konsege nafatin rezolve problema bolseiru sira ne’ebé hala’o estudu iha Solo Indonesia.

Diretór Jeral ne’e sujere mós kona-ba programa bolsa estudu ba kbiit laek sira bele mós kontinua apoiu kontinuasaun ba benefisiariu sira ne’ebé hetan ona Bolsa da Mãe ne’ebé governu konsege apoiu ona sira nia estudu hosi ensinu báziku to’o Ensinu Sekundariu no ba universidade sira hasoru difikuldade iha área finanseiru.

Akompaña Sekretáriu Ezekutivu FDCH iha enkontru ne’e mak Koordenadora GAFRHI Sra. Leila Carceres, Jurista FDCH Sra. Estefánia Coreia no Xefe Departamentu Peskiza GAPPEFIV-FDCH   Sr. Hermenegildo da Silva. Entretantu hosi parte MSSI nian partisipa mós hosi Diretór Jeral no Asesor sira Ministra nian. (Média FDCH)

Related Post :


Total Viewer : 3193 Views || Category: Notisia